الماتى وبلىسىندا بالىق اۋلاۋمەن اينالىسقان ءۇش ادامدى ولتىرمەك بولعان ەر ادام 15 جىلعا باس بوستاندىعىنان ايىرىلدى، دەپ حابارلايدى Dalanews.kz.
قىلمىستىق ىستەر جونىندەگى مامانداندىرىلعان اۋدانارالىق سوتىندا حابارلانعانداي، وقيعا 2024 جىلدىڭ 26 قازانىندا بولعان.
ازامات ت.، قونايەۆ-باقاناس تاس جولىنىڭ 26-شاقىرىمىنداعى شارۋا قوجالىقتىڭ بىرىندە وتىرىپ، الكوگولدىك ىشىمدىك ءىشىپ، ساعات 22:00 شاماسىندا ىلە وزەنىنىڭ جاعالاۋىنا قاراي بەت العان. بالىق اۋلاپ جۇرگەن ءۇش ازاماتتى – ۋ.، د. جانە ك.-نى كورىپ، ولاردىڭ باعىتىندا مىلتىقتان بىرنەشە رەت وق اتقان.
ۇشەۋى دە ءارتۇرلى دارەجەدەگى جاراقات العانىمەن، دەر كەزىندە كورسەتىلگەن مەديسينالىق كومەكتىڭ ارقاسىندا جابىرلەنۋشىلەر امان قالدى.
سوت وتىرىسى بارىسىندا جابىرلەنۋشىلەر مەن كۋاگەرلەردىڭ ايعاقتارى، سوت-مەديسينالىق ساراپتاماسىنىڭ قورىتىندىلارى، تەرگەۋ حاتتامالارى جانە باسقا دا دالەلدەمەلەر زەرتتەلدى.
ۇسىنىلعان ماتەريالدار نەگىزىندە سوت سوتتالۋشىنىڭ ارەكەتىن ەكى نەمەسە ودان دا كوپ ادامدى ولتىرۋگە وقتالۋ رەتىندە سارالاۋ كەرەك دەگەن قورىتىندىعا كەلدى.
سوت ازاماتتى قازاقستان رەسپۋبليكاسى قىلمىستىق كودەكسىنىڭ 24-بابىنىڭ 3-بولىگىمەن جانە 99-بابىنىڭ 2-بولىگىنىڭ 1-تارماعىمەن كىنالى دەپ تانىدى، بۇل رەتتە اۋىرلاتاتىن ءمان-جاي رەتىندە الكوگولدىك ماساڭ كۇيدى كورسەتتى.
سوت ت.-نى 15 جىلعا باس بوستاندىعىنان ايىرۋ جازاسىن قاۋىپسىزدىگى ورتاشا مەكەمەدە وتەۋگە ۇكىم ەتتى. ودان سوت ساراپتاماسىن جۇرگىزۋگە بايلانىستى پروسەسسۋالدىق شىعىندار دا ءوندىرىلدى.
