Almaty oblysynda balyq aýlaýmen ainalysqan úsh adamdy óltirmek bolǵan er adam 15 jylǵa bas bostandyǵynan aiyryldy, dep habarlaidy Dalanews.kz.
Qylmystyq ister jónindegi mamandandyrylǵan aýdanaralyq sotynda habarlanǵandai, oqiǵa 2024 jyldyń 26 qazanynda bolǵan.
Azamat T., Qonaev-Baqanas tas jolynyń 26-shaqyrymyndaǵy sharýa qojalyqtyń birinde otyryp, alkogoldik ishimdik iship, saǵat 22:00 shamasynda Ile ózeniniń jaǵalaýyna qarai bet alǵan. Balyq aýlap júrgen úsh azamatty – Ý., D. jáne K.-ny kórip, olardyń baǵytynda myltyqtan birneshe ret oq atqan.
Úsheýi de ártúrli dárejedegi jaraqat alǵanymen, der kezinde kórsetilgen meditsinalyq kómektiń arqasynda jábirlenýshiler aman qaldy.
Sot otyrysy barysynda jábirlenýshiler men kýágerlerdiń aiǵaqtary, sot-meditsinalyq saraptamasynyń qorytyndylary, tergeý hattamalary jáne basqa da dáleldemeler zertteldi.
Usynylǵan materialdar negizinde sot sottalýshynyń áreketin eki nemese odan da kóp adamdy óltirýge oqtalý retinde saralaý kerek degen qorytyndyǵa keldi.
Sot azamatty Qazaqstan Respýblikasy Qylmystyq kodeksiniń 24-babynyń 3-bóligimen jáne 99-babynyń 2-bóliginiń 1-tarmaǵymen kináli dep tanydy, bul rette aýyrlatatyn mán-jai retinde alkogoldik masań kúidi kórsetti.
Sot T.-ny 15 jylǵa bas bostandyǵynan aiyrý jazasyn qaýipsizdigi ortasha mekemede óteýge úkim etti. Odan sot saraptamasyn júrgizýge bailanysty protsessýaldyq shyǵyndar da óndirildi.
