جاڭا ءتيىمدى دەنساۋلىق ساقتاۋ جۇيەسىن قالىپتاستىرۋ  ماقساتىندا مىندەتتى الەۋمەتتىك مەديسينالىق ساقتاندىرۋ ىسكە قوسىلعان ەدى.  بۇقارانىڭ پايداسىنا تيگەن بۇل جوبانىڭ ەلگە بەرەرى مول بولعانى اقيقات. اۋەلى، تۇرعىندار ءمامس ارقىلى قازاقستان اۋماعىندا ءوزى تاڭداعان تاڭداعان كەز كەلگەن ەمحانادان مەديسينالىق كومەك الۋعا قول جەتكىزدى. سونىمەن قاتار،  تەگىن مەديسينالىق كومەكتىڭ كەپىلدەندىرىلگەن كولەمى جانە ءمامس پاكەتتەرى شەڭبەرىندە قاراستىرىلعان مەديسينالىق كومەككە جۇمسالاتىن قوسىمشا تولەمدەردىڭ بارلىق تۇرىنەن بوساتىلعان بولاتىن. قوش، جاڭا ەنگىزىلگەن جۇيە سىننان سۇرىنبەدى. ولاي بولسا العاشقى جىلداعى قورىتىندىعا          كوز جۇگىرتسەك.
الماتى وبلىسى بويىنشا 2020 جىلعا انىقتالعان بيۋدجەت سوماسى – 136،4 ملرد. تەڭگەنى قۇراعان-تىن. ونىڭ ىشىندە تەگىن مەديسينالىق كەپىلدەندىرىلگەن كومەك كولەمى اياسىندا – 94،0 ملرد تەڭگەنى، ءمامس اياسىندا – 42،4 ملرد تەڭگەنى قۇرادى.

قازىرگى تاڭدا وبلىس اياسىندا 76 مەديسينالىق مەكەمەمەن كەلىسىم شارتتار جاسالدى، ونىڭ ىشىندە مەملەكەتتىك مەنشىكتەگى – 44،  ياعني 58%، جەكە مەنشىكتەگى - 32 مەكەمە دەمەك  42%-دىق كورسەتكىشتى كورسەتۋدە.

COVID-19 تارالۋىن الدىن-الۋ ماقساتىندا ءىس-شارالاردى قارجىلاندىرۋعا 2020 جىلى الماتى وبلىسى بويىنشا 16،8 ملرد. تەڭگە يگەرىلدى.

سونىڭ ىشىندە:

- مەديسينالىق قىزمەتكەرلەردى ىنتالاندىرۋعا – 7،8 ملرد تەڭگە؛

- ستاسيونارلىق كومەككە – 5،3 ملرد تەڭگە؛

- پتر زەرتتەۋگە – 2،7 ملرد تەڭگە؛

– ءموبيلدى بريگادالار جۇمىسىنا – 981 ملن تەڭگە قاراستىرلعان.

 

«ءمامس ەنگىزىلۋىنە بايلانىستى ازاماتتار ءۇشىن ءبىرقاتار قىزمەتتەر تەگىن قولجەتىمدى بولدى. اعىمداعى جىلى مەديسينالىق وڭالتۋ قىزمەتتەرى، قىمبات كونسۋلتاتيۆتىك-دياگنوستيكالىق قىزمەتتەر (كدق) جانە جوعارى تەحنولوگيالىق مەديسينالىق كومەك بويىنشا ءوسىم بايقالادى. مىسالى، مەديسينالىق وڭالتۋ بويىنشا بيىل 9 671 پاسيەنت قىزمەت الدى، ال 2019 جىلى 7 150 پاسيەنت (24،8%-عا ءوستى)؛ جوعارى تەحنولوگيالىق مەديسينالىق كومەك بويىنشا 2020 جىلى 140 پاسيەنت قىزمەت الدى، ال 2019 جىلى 110، ياعني  27%-عا ءوستى. كونسۋلتاتيۆتى-دياگنوستيكالىق قىزمەت بويىنشا: كت 2019 جىلى – 9156 جانە 2020 جىلى – 22177 قىزمەت 2،4 ەسەگە ارتسا،  مرت 2019 جىلى –1228 جانە 2020 ج. – 11169 قىزمەت 9 ەسە وسكەن»، – دەيدى الەۋمەتتىك مەديسينالىق ساقتاندىرۋ قورىنىڭ الماتى وبلىسى بويىنشا فيليالىنىڭ ديرەكتورى نۇرلان وتارعالييەۆ.

ازاماتتاردىڭ ساقتاندىرۋ مارتەبەسىن وزەكتەندىرۋ بويىنشا جۇمىستىڭ ناتيجەسى بويىنشا، ساقتاندىرىلعان حالىقتىڭ سانى ارتتى. قازىرگى تاڭدا وبلىس بويىنشا ساقتاندىرىلماعان ازاماتتاردىڭ سانى 447 650 ادامدى قۇراۋدا.

ءمامس ءۇشىن مەملەكەت تاراپىنان قارجىلاندىرىلاتىن ادام سانى جەڭىلدىگى بار ازاماتتار ساناتى – 56،2%، جالدامالى قىزمەتكەرلەر – 19،4%، جەكە كاسىپكەرلەر مەن ازاماتتىق-قۇقىقتىق سيپاتتاعى شارتتار بويىنشا قىزمەتكەرلەر – 5،7%، دەربەس تولەۋشىلەر – 1،4% جانە بجت تولەۋشىلەر – 17،3%.

ۇسىتىمىزدەگى جىلى، نۇرلان تاڭجارىق ۇلىنىڭ ايتۋىنشا، دارىگەرلەردىڭ جالاقىسىن 30% دەيىن جانە ورتا مەديسينا قىزمەتكەرلەرىنىڭ جالاقىسىن 20%  دەيىن ارتتىرۋعا قاراجات جوسپارلانعان.سونداي-اق، اۋىلدىق جەرلەردە مەديسينالىق قىزمەتتەردىڭ قولجەتىمدىلىگىن ارتتىرۋ بويىنشا قارجىلاندىرۋ كولەمى 20%-عا  وسەدى دەپ كۇتىلۋدە.

«پرەزيدەنت قاسىم-جومارت توقايەۆتىڭ تاپسىرماسى بويىنشا ەكستراكورپورالدى ۇرىقتاۋ قىزمەتتەرىنىڭ سانى جەتى ەسەگە ارتقانىن اتاپ وتكەن ءجون. ەگەر 2020 جىلى 1000-نان استام وتباسىعا انا مەن اكە بولۋ قۋانىشىن سەزىنۋ مۇمكىندىگى تۋسا، 2021 جىلى ولاردىڭ سانى 7 مىڭعا دەيىن ارتادى»،- دەدى الەۋمەتتىك مەديسينالىق ساقتاندىرۋ قورىنىڭ الماتى وبلىسى بويىنشا فيليالىنىڭ ديرەكتورى نۇرلان وتارعالييەۆ.

حالىققا ىڭعايلى بولۋ ءۇشىن قور كەرى بايلانىستىڭ ءتۇرلى ارنالارىن ۇسىنۋ بويىنشا جۇمىس جۇرگىزۋدە. Qoldau 24/7 ءموبيلدى قوسىمشاسى، SaqtandyryBot تەلەگرام ارناسى، fms.kz جانە egov.kz سايتتارى ارقىلى ساقتاندىرۋ مارتەبەسىن انىقتاپ، كەڭەس الۋعا بولادى. قوردىڭ تاۋلىك بويى جۇمىس ىستەيتىن 1406 كولل-ورتالىعى قىزمەت اتقارادى.

«ءبىزدىڭ ماقساتىمىز – دەنساۋلىق ساقتاۋ جۇيەسىندەگى مەديسينالىق كومەكتىڭ ساپاسىن ارترىرۋدا جانە مەديسينالىق قىزمەتتەردى ۇسىناتىن مەكەمەلەردىڭ  باسەكەگە قابىلەتتىگىن ارتتىرۋ. ءبىز ادال باسەكەلەستىك دەگەن ۇستانىمعا بەرىك بولامىز، بۇل ساپالى مەديسيناعا اپاراتىن جول دەپ سەنەمىز»،-دەپ ءسوزىن تۇيىندەدى نۇرلان تاڭجارىق ۇلى.