بۇگىن الماتى وبلىسىنىڭ جولاۋشىلار تاسىمالى جانە اۆتوموبيل جولدارى باسقارماسىنىڭ باسشىسى الماس باتانوۆ جۋرناليستەرمەن كەزدەسۋ وتكىزدى، -دەپ حابارلادى وبلىس اكىمىنىڭ باسپا ءسوز قىزمەتى.

وڭىرلىك كوممۋنيكاسيا قىزمەتى الاڭىندا وتكەن ءىس-شارادا جولاۋشىلار تاسىمالى سالاسىنداعى پروبلەمالاردى شەشۋ جولدارى ايتىلدى.
ءبىرىنشى كەزەكتە باسقارما باسشىسى بۇگىنگى جاعدايعا باسا نازار اۋداردى.

«قالا ماڭىنداعى مارشرۋتتارعا قاتىستى تۇرعىندار مەن ب ا ق وكىلدەرىنىڭ نازارىنا 2016 جىلعى 9 جەلتوقساننان باستاپ «اۆتوموبيل كولىگى تۋرالى» ق ر زاڭىنا، سونداي-اق «اۆتوكولىكپەن جولاۋشىلار مەن باگاجدى تاسىمالداۋ ەرەجەلەرىنە» سايكەس قالا ماڭىنداعى تۇراقتى مارشرۋتتاردى ۇيىمداستىرۋدى الماتى قالاسىنىڭ قالالىق موبيلدىلىك باسقارماسى جۇزەگە اسىراتىنىن جەتكىزگىم كەلەدى. ياعني، ەلدى مەكەندى ەلدى مەكەننىڭ بەلگىلەنگەن شەكاراسىنان ولشەنەتىن ۇزىندىعى ەلۋ شاقىرىمعا دەيىنگى قالا ماڭىنداعى ايماقپەن بايلانىستىراتىن مارشرۋتتار بويىنشا تاسىمالداۋ الماتى قالاسىنىڭ قۇزىرەتىندە بولادى. وسىعان بايلانىستى، قالالىق موبيلدىلىك باسقارماسى الماتى وبلىسىنىڭ ەلدى مەكەندەرىنىڭ قالا ماڭىنداعى باعىتتارى بويىنشا 26 اۆتوبۋس قاتىناسىن ۇيىمداستىردى. بۇل وبلىستىڭ 50 - گە جۋىق ەلدى مەكەنىن الماتى قالاسىمەن بايلانىستىرۋعا مۇمكىندىك بەرەدى»، - دەپ اتاپ ءوتتى الماس باتانوۆ.

سونىمەن قاتار، ول بارلىق 50 شاقىرىمدىق ايماقتى قامتۋ ءۇشىن تاعى 35 ەلدى مەكەندى اۆتوبۋس قاتىناسىمەن قوسۋ قاجەتتىگىن اتاپ ءوتتى.

باسقارما باسشىسى الماتى قالاسىنا جاقىن ورنالاسقان ەلدى مەكەندەر تۇرعىندارىنىڭ كوپتەگەن وتىنىشتەرىن نازارعا الا وتىرىپ، ۆەدومستۆو اعىمداعى جىلدىڭ 3 توقسانىنىڭ سوڭىنا دەيىن ورىنداۋ مەرزىمىمەن 10 جاڭا قالا ماڭىنداعى مارشرۋتتاردى اشۋ جونىندە ۇسىنىستار جىبەرگەنىن اتاپ ءوتتى.

«سونداي-اق، مەملەكەت باسشىسى الماتى وبلىسىنا جۇمىس ساپارى بارىسىندا الماتى اگلومەراسيالارى شەڭبەرىندە اۆتوبۋس قاتىناسىمەن قامتىلماعان اۋىلدىق ەلدى مەكەندەردى اۆتوبۋس مارشرۋتتارىمەن قامتاماسىز ەتۋ تۋرالى تاپسىرما بەردى. وسى مىندەتتەردى شەشۋ ءۇشىن وبلىس اكىمدىگى 31 قاڭتاردا مۋنيسيپالدى اۆتوبۋس پاركىن زاڭدى تۇردە تىركەدى، ونىڭ مىندەتتەرىنە قازىرگى ۋاقىتتا مارشرۋتتار جوق الەۋمەتتىك ماڭىزى بار باعىتتار بويىنشا ماسەلەلەردى شەشۋ كىرەدى. بۇگىنگى تاڭدا اۆتوبۋس مارشرۋتتارىن، قوزعالىس سىزبالارى مەن كەستەلەرىن ازىرلەۋ، اۆتوبۋستار ءۇشىن ايالداما ورىندارىن انىقتاۋ جۇمىستارى جۇرگىزىلۋدە. مارشرۋتتارعا العاشقى اۆتوبۋستاردى ىسكە قوسۋ اعىمداعى جىلدىڭ 2ء-شى جارتىجىلدىعىندا جوسپارلانۋدا»، - دەپ تۇيىندەدى باتانوۆ.

ەستەرىڭىزگە سالا كەتەيىك، وتكەن جىلدىڭ 11 قاراشاسىنان باستاپ الماتى مەن قونايەۆ قالالارى اراسىنداعى ەلەكتر پويىزىنىڭ باعىتى قايتا جانداندى. قالا ماڭىنداعى پويىز كۇندەلىكتى جۇرەدى. قونايەۆتان تاڭعى ساعات 06.00-دە اتتانىپ، الماتىدان كەشكى 19.00-دە كەرى جونەلتىلەدى.