ىلە اۋدانى قۇرىت اۋىلدىق وكرۋگىندە ەرەكشە مادەني شارا «الەمدەگى ەڭ ۇلكەن تۇيە كەرۋەنى»، دەپ حابارلايدى Dalanews.kz.
ءوڭىر اكىمدىگىنىڭ مالىمەتىنشە، ءىس-شارا ۇلتتىق رۋحتى قايتا جاڭعىرتۋ، كوشپەلى مادەنيەتتى دارىپتەۋ، سونداي-اق تۋريزم مەن كاسىپكەرلىكتى دامىتۋ ماقساتىندا جەكە كاسىپورىننىڭ ۇيىمداستىرۋىمەن ءوتتى. باستى ماقسات - الەمدىك رەكورد ورناتۋ.
كەرۋەنگە 1000 تۇيە قاتىسىپ، ۇزىندىعى 1 شاقىرىمعا جەتەتىن ارنايى دايىندالعان مارشرۋتپەن ءجۇرىپ ءوتتى. بۇعان دەيىنگى رەكورد قىتايدا 2022 جىلى تىركەلگەن بولاتىن، ول كەزدە بار بولعانى 365 تۇيە قاتىسقان ەدى.
كورەرمەندەر مەن قاتىسۋشىلاردىڭ قاۋىپسىزدىگى ءۇشىن پوليسيا، ءورت ءسوندىرۋ بولىمشەلەرى، دارىگەرلەر مەن ۆەتەرينارلىق قىزمەت جۇمىلدىرىلدى. ايماق تۋرنيكەتتەرمەن جابدىقتالىپ، كورەرمەندەردىڭ كەرۋەنگە جاقىنداۋى شەكتەلدى.
شاراعا ۇلىبريتانيادان ارنايى كەلگەن گيننەس رەكوردتار كىتابىنىڭ وكىلى ريچارد ستەننينگ قاتىستى. ول ءوز سوزىندە مۇنداي اۋقىمداعى تۇيە كەرۋەنىن العاش رەت كورىپ وتىرعانىن اتاپ ءوتتى. ونىڭ ايتۋىنشا، قازاقستان رەسمي تۇردە «الەمدەگى ەڭ ۇلكەن تۇيە كەرۋەنى» اتاعىنا يە بولادى جانە بارلىق راسىمدەر اياقتالعان سوڭ بۇل كورسەتكىش گيننەس رەكوردتار كىتابىنا ەنگىزىلەدى.
