قازاقستاندا قاناتىن كەڭگە جايا باستاعان بوچچا سپورتى پاراليمپيادا ويىندارىنىڭ ءبىر بولىگى بولىپ سانالادى. سونىمەن قاتار ينكليۋزيۆتى سپورت ءتۇرى.
الدىمەن قازاقستانداعى بوچچا فەدەراسياسىنىڭ قۇرىلۋ تاريحى تۋرالى ايتا كەتسەك، ۇيىم 2021 جىلى مۇگەدەكتىگى بار بالالاردى تاربيەلەپ وتىرعان اتا-انالاردىڭ جانە «تەڭ مۇمكىندىكتەر الەمى» قورىنىڭ جاتتىقتىرۋشىلارىنىڭ باستاماسىمەن قۇرىلعان. بۇگىندە فەدەراسيانىڭ وقۋ جاتتىعۋلارى ەلىمىزدىڭ بارلىق 20 وڭىرىندە جۇرگىزىلۋدە.
جالپى، قازاقستان بويىنشا 10 ايماقتا فەدەراسيا وكىلدىكتەرى قۇرىلىپ، جان-جاقتى ەڭبەك ەتىپ جاتىر.
2023 جىلى فەدەراسيا پرەزيدەنتى داۋازىمىنا قازاقستان رەسپۋبليكاسى پارلامەنتى سەناتىنىڭ سپيكەرى ماۋلەن اشىمبايەۆ سايلاندى. سونداي-اق بىلتىر فەدەراسيا رەسمي تۇردە حالىقارالىق بوچچا فەدەراسياسى – Boccia International Sports Federation (BISFed) مۇشەسى بولدى.
فەدەراسيا ۇلتتىق جانە حالىقارالىق دەڭگەيدە جارىساتىن ەرەكشە قاجەتتىلىكتەرى بار 150-دەن استام سپورتشىنىڭ باسىن قوسادى. سپورت قاۋىمداستىعىنىڭ العا قويعان ماقساتتارىنىڭ ءبىرى – بوچچادان قازاقستان قۇراماسىن پاراليمپيادا ويىندارىنا شىعارۋ. ءقازىردىڭ وزىندە سپورتشىلار حالىقارالىق جارىستاردا توپ جارىپ ءجۇر.
اعىمداعى جىلدىڭ تامىز ايىندا كوماندا پولشادا وتكەن العاشقى حالىقارالىق Poznan Boccia Challenger باسەكەسىندە تاماشا ناتيجە كورسەتتى. سودان سوڭ گرەكيادا وتكەن World Boccia Heraklion Challenger جارىسىندا ۆيكتور كوجيەۆنيكوۆ 4-ورىن السا، قىتايدىڭ حانچجوۋ قالاسىندا وتكەن ازيا پارا ويىندارىندا شىڭعىسحانوۆا يتيانا 6-ورىنعا يە بولدى.
نەگىزى، بۇل ويىننىڭ تاريحى ءبىزدىڭ داۋىرىمىزگە دەيىنگى جۇزدەگەن جىلدار بۇرىن باستالعان، ءبىراق ونىڭ قازىرگى زامانعى ءتۇرى يتاليادا باستاۋ العان.
بوچچا ەۋروپا ەلدەرىندە وتە تانىمال، ونىڭ ەرەجەلەرى قيىن ەمەس، ءبىراق بەلگىلى ءبىر داعدىلاردى قاجەت ەتەدى. سوندىقتان ول نەگىزىنەن مۇگەدەكتىگى بار جانداردى وڭالتۋ ءۇشىن قولدانىلادى.
ويىن زەيىندى، دالدىكتى، ەپتىلىكتى جانە مۇقيات دايىندىقتى قاجەت ەتەدى.
ەڭ باستىسى، ورتالىق جۇيكە جۇيەسى مەن تىرەك-قيمىل اپپاراتى اۋىر زاقىمدانعان ادامدار ءۇشىن بوچچا تاپتىرماس سپورت ءتۇرى. سونداي-اق سپورتشىنىڭ فيزيكالىق جاعدايىنا جاقسى اسەر ەتەدى، مۇگەدەكتەردىڭ الەۋمەتتەنۋىنە كومەكتەسەدى جانە ولاردىڭ ويلاۋىن دامىتادى.
ويىننىڭ ەرەجەسى مىناداي: باستاپقى دوپتى لاقتىراتىن ويىنشى جەرەبە ارقىلى انىقتالادى. كەلەسى لاقتىرۋ كەزىندە ويىنشىلار دوپتارىن مۇمكىندىگىنشە باستاپقى دوپقا جاقىن ورنالاستىرۋعا تىرىسادى. وسىدان كەيىن قاتىسۋشىلار كىمنىڭ دوپتارى باستاپقى دوپقا جاقىن ەكەنىن انىقتايدى جانە ۇپاي جينايدى.
ۇپايلاردى قورىتىندىلاۋ ارقىلى ويىنشىلاردىڭ قايسىسى ەڭ كوپ ۇپاي جيناعانى انىقتالادى. بۇل ويىنشى (نەمەسە كوماندا) ويىندا جەڭىسكە جەتەدى جانە كەلەسى ويىندا ءبىرىنشى لاقتىرۋ مۇمكىندىگىن الادى.
ال وسى ويىن ءتۇرىنىڭ ەلىمىزدە كەڭىنەن ەتەك جايۋىنا سەپتەسىپ جۇرگەن اتىمتاي جومارت ازاماتتار از ەمەس. سولاردىڭ قاتارىندا ەرلان انداسبايەۆتى ايرىقشا اتاپ ءوتۋ قاجەت. "Aneko group" كومپانياسىنىڭ يەسى سانالاتىن مەسەنات "Coca-cola" جانە سول دەڭگەيدەگى باسقا دا الەمدىك برەندتەردىڭ قازاقستانداعى ديستريبيۋتورى. تاعى ءبىر كومپانياسى "Food-master" برەندىنىڭ قويما قىزمەتىن اۋتسورسينگ جۇيەسى بويىنشا باسقارادى.
ەرلان انداسبايەۆتىڭ پايىمىنشا، ءاربىر كاسىپكەردىڭ ءبىر مۇراتى – الەۋمەتتىك باعىتتا قايىرىمدىلىق كورسەتۋ بولۋى قاجەت. بۇل ءارى تۋعان ەل مەن جەرگە قىزمەت ەتۋگە سايادى.
مەسەناتتىڭ ءبىر قىرى – ول الەمدى كەزىپ جۇرگەن ساياحاتشى. دۇنيەنىڭ كوپتەگەن ەلدەرىنە تابانى تيگەن. دامىعان مەملەكەتتەر مۇگەدەكتىگى بار ازاماتتارىن سىرت تەپپەي، قايتا قوعامعا تارتادى، كومەكتەسەدى. ول دا ءبىزدىڭ ەلىمىزدىڭ سول دەڭگەيگە شىعۋىنا كۇش سالعىسى كەلەدى. وسى ورايدا، كاسىپكەر قازاقستاندا بوچچانىڭ ىلگەرىلەۋىنە تامشىداي بولسا دا ۇلەس قوسقانىن ماقتان تۇتادى.
