2019 جىلى جەتىساي اۋدانى بويىنشا جالپى ۇزىندىعى 89 شاقىرىمدى قۇرايتىن 123 كوشەنى ورتا جوندەۋدەن وتكىزۋ ءۇشىن 1 ملرد 130 ملن 76 مىڭ تەڭگەگە سمەتالىق قۇجاتتامالار ازىرلەنىپتى. بۇل جايىندا كۇنى كەشە عانا تۇركىستان قالاسىندا جۋرناليستەردىڭ باسىن قوسىپ، بريفينگ وتكىزگەن اۋدان اكىمى جامانتاي بەيسەنبايەۆ ءمالىم ەتتى.

سونداي-اق، جىلىسۋ اۋىل وكرۋگى باققونىس-2 ەلدىمەكەنىنە كىرەبەرىس اۆتوموبيل جولىن كۇردەلى جوندەۋدەن وتكىزۋ ءۇشىن 164 ملن 203 مىڭ تەڭگەگە جوبالاۋ سمەتالىق قۇجاتتاما ازىرلەنگەن. اۋدان اكىمى بۇل باعىتتا سالا ماماندارى جۇمىس ىستەپ جاتقانىن العا تارتتى. اۋداندا جول جوندەلگەن سايىن حالىقتىڭ بارىس-كەلىسى جاقسارىپ، تۇرمىستارى تۇزەلە تۇسەتىنى بەلگىلى. سوندىقتان بۇل باعىتتاعى جۇمىستاردىڭ قارقىنىن باسەندەتپەۋ ماڭىزدى.

وعان قوسا اتامەكەن اۋىلدىق وكرۋگى ماقتاشى جانە قوعالى اۋىلدارى ارالىعىنداعى كوپىردى كۇردەلى جوندەۋدەن وتكىزۋ ءۇشىن 154 ملن تەڭگەگە جوبالاۋ سمەتالىق قۇجاتتاما دايىندالدى.

ال جالپى اۋدانىمىزدىڭ كولىك جولدارىنىڭ جالپى ۇزىندىعى 376،1 شاقىرىمدى قۇرايدى. وسى جولداردىڭ 43،6 شاقىرىمى رەسپۋبليكالىق، 215،3 شاقىرىمى وبلىستىق، 117،2 شاقىرىمى اۋداندىق ماڭىزى بار. ال ىشكى كوشەلەردىڭ جالپى ۇزىندىعى 863 شاقىرىمدى قۇرايدى. ياعني 1145 كوشە بار.