"سامۇرىق-قازىنا" ءۇاق ديرەكتورلار كەڭەسىنىڭ قۇرامىنا ۆونگ حەن فاين مىرزا قوسىلدى. ول Asia Infrastructure Solutions Singapore كومپانياسىنىڭ ءتوراعاسى، سونىمەن قاتار الماتى وبلىسىندا جاڭادان قۇرىلعان الاتاۋ قالاسىنىڭ قۇرىلىسى مەن جوباسى بويىنشا باس كەڭەسشى بولىپ تابىلادى، دەپ حابارلايدى Dalanews.kz.
بۇل تۋرالى اقپارات بۇگىن، 29 قازاندا kase سايتىندا جاريالاندى.
"سامۇرىق-قازىنا" ديرەكتورلار كەڭەسىنىڭ قۇرامىندا ۆونگ حەن فاين پرەمەر-مينيستردىڭ ورىنباسارى — ۇلتتىق ەكونوميكا ءمينيسترى نۇرلان بايبازاروۆتىڭ ورنىن باسقان ەكەن.
مۇنداي شەشىمدى قوردىڭ جالعىز اكسيونەرى-قازاقستان ۇكىمەتى 2024 جىلى 19 قازاندا قابىلدادى. ديرەكتورلار كەڭەسىنىڭ قۇرامى جەتى ادامنان تۇرادى. ونى ق ر پرەمەر-مينيسترى ولجاس بەكتەنوۆ باسقارادى. وزگە مۇشەلەرىن اتاپ ايتساق، ولار: ق ر پرەزيدەنتىنىڭ كەڭەسشىسى ەرۇلان جاماۋبايەۆ، "سامۇرىق-قازىنا" اق باسقارماسىنىڭ ءتوراعاسى نۇرلان جاقىپوۆ جانە ءتورت تاۋەلسىز ديرەكتور — بولات جامىشيەۆ، لۋكا سۋتەرا، مۇحاممەد جاميل ءال راماحي جانە ۆونگ حەن فاين.
ايتا كەتسەك، الماتى وبلىسىندا جەتىگەن اۋىلىنىڭ ورنىندا الاتاۋ قالاسى پايدا بولماق. بۇل تۋرالى جارلىققا توقايەۆ 2024 جىلدىڭ قاڭتارىندا قول قويدى. 2024 جىلدىڭ مامىرىندا جاڭا قالانىڭ باس جوسپارى قابىلدانعانى، قۇجات سينگاپۋرلىق Surbana Jurong كومپانياسىمەن بىرلەسىپ ازىرلەنگەنى بەلگىلى بولدى.
