الاتاۋ قالاسىنان الماتىعا دەيىن اۋە تاكسيىمەن نەبارى 10–15 مينۋتتا جەتۋگە مۇمكىندىك تۋادى. بۇل تۋرالى پرەمەر-مينيستردىڭ ورىنباسارى قانات بوزىمبايەۆ مالىمدەدى، دەپ حابارلايدى Dalanews.kz.

ونىڭ ايتۋىنشا، الاتاۋ قالاسىن دامىتۋدىڭ نەگىزگى باعىتتارىنىڭ ءبىرى – تومەن بيىكتەگى اۋە ەكونوميكاسىن قالىپتاستىرۋ. ياعني، دروندار مەن اۋە تاكسيلەردى پايدالانۋ ارقىلى جاڭا كولىك جۇيەسىن ەنگىزۋ كوزدەلىپ وتىر.

بوزىمبايەۆتىڭ سوزىنشە، الاتاۋ قىتايدان تىس جەردە العاش رەت وسىنداي تەحنولوگيالاردى ۇزاق قاشىقتا، 120 مەتردەن جوعارى بيىكتە سىناقتان وتكىزەتىن الاڭعا اينالماق.

سونداي-اق ول بۇل باعىتتا حالىقارالىق كومپانيالارمەن جۇمىس جۇرگىزىلىپ جاتقانىن اتاپ ءوتتى.

“ءقازىر اقش-تىڭ وسى سالاداعى جەتەكشى كومپانيالارىنىڭ ءبىرى – Joby Aero جانە قىتايدىڭ AutoFlight كومپانياسىمەن كەلىسسوزدەر جۇرگىزىپ جاتىرمىز. ءبىرقاتار قۇجاتتارعا قول قويىلدى. بۇل كومپانيالاردىڭ اەروتاكسيلەرىنە ءقازىردىڭ وزىندە 15 جىلعا كەزەك بار”، – دەدى ۆيسە-پرەمەر.

جوبا اياسىندا ارنايى كۆادروپورتتار سالۋ جوسپارلانعان. ولار الاتاۋ، قونايەۆ قالالارىن، الماتىنىڭ بىرنەشە نۇكتەسىن جانە تۋريستىك ايماقتاردى ءوزارا بايلانىستىرادى. ناتيجەسىندە جولاۋشىلار مەدەۋ شاتقالىنا، تاۋ كلاستەرىنە نەمەسە قاپشاعاي جاعالاۋىنا اۋە تاكسي ارقىلى جىلدام قاتىناي الادى.

“بۇل ءتۋريزمدى دامىتۋعا ۇلكەن سەرپىن بەرەدى. ءبىز بۇل باعىت بويىنشا جىلىنا شامامەن 8 ميلليون ءتۋريستى تارتۋعا بولادى دەپ وتىرمىز”، – دەدى بوزىمبايەۆ.

ونىڭ سوزىنشە، اۋە تاكسيلەردىڭ جىلدامدىعى ساعاتىنا 300–350 شاقىرىمعا دەيىن جەتەدى.

“العاشقى كەزەڭدە، الداعى 2–3 جىل ىشىندە الاتاۋ، الماتى جانە الماتى وبلىسى اراسىنداعى اۋە قاتىناسى 10–15 مينۋتتى عانا الادى. بۇل – ارنايى بولىنگەن اۋە دالىزدەرى ارقىلى جۇزەگە اساتىن، كوبىنە پيلوتسىز اۆياسيا بولادى”، – دەپ تۇيىندەدى ول.