Alataý qalasynan Almatyǵa deiin áýe taksiimen nebári 10–15 minýtta jetýge múmkindik týady. Bul týraly Premer-ministrdiń orynbasary Qanat Bozymbaev málimdedi, dep habarlaidy Dalanews.kz.
Onyń aitýynsha, Alataý qalasyn damytýdyń negizgi baǵyttarynyń biri – tómen biiktegi áýe ekonomikasyn qalyptastyrý. Iaǵni, drondar men áýe taksilerdi paidalaný arqyly jańa kólik júiesin engizý kózdelip otyr.
Bozymbaevtyń sózinshe, Alataý Qytaidan tys jerde alǵash ret osyndai tehnologiialardy uzaq qashyqta, 120 metrden joǵary biikte synaqtan ótkizetin alańǵa ainalmaq.
Sondai-aq ol bul baǵytta halyqaralyq kompaniialarmen jumys júrgizilip jatqanyn atap ótti.
“Qazir AQSh-tyń osy saladaǵy jetekshi kompaniialarynyń biri – Joby Aero jáne Qytaidyń AutoFlight kompaniiasymen kelissózder júrgizip jatyrmyz. Birqatar qujattarǵa qol qoiyldy. Bul kompaniialardyń aerotaksilerine qazirdiń ózinde 15 jylǵa kezek bar”, – dedi vitse-premer.
Joba aiasynda arnaiy kvadroporttar salý josparlanǵan. Olar Alataý, Qonaev qalalaryn, Almatynyń birneshe núktesin jáne týristik aimaqtardy ózara bailanystyrady. Nátijesinde jolaýshylar Medeý shatqalyna, taý klasterine nemese Qapshaǵai jaǵalaýyna áýe taksi arqyly jyldam qatynai alady.
“Bul týrizmdi damytýǵa úlken serpin beredi. Biz bul baǵyt boiynsha jylyna shamamen 8 million týristi tartýǵa bolady dep otyrmyz”, – dedi Bozymbaev.
Onyń sózinshe, áýe taksilerdiń jyldamdyǵy saǵatyna 300–350 shaqyrymǵa deiin jetedi.
“Alǵashqy kezeńde, aldaǵy 2–3 jyl ishinde Alataý, Almaty jáne Almaty oblysy arasyndaǵy áýe qatynasy 10–15 minýtty ǵana alady. Bul – arnaiy bólingen áýe dálizderi arqyly júzege asatyn, kóbine pilotsyz aviatsiia bolady”, – dep túiindedi ol.
