الاكولدى دامىتۋدىڭ باس جوسپارى ازىرلەنىپ جاتىر. بۇل تۋرالى اباي وبلىسىنىڭ اكىمى بەرىك ءۋالي مالىمدەدى، دەپ حابارلايدى Dalanews.kz.
شەنەۋنىكتىڭ ايتۋىنشا، الاكول جاعالاۋىندا دەمالۋشىلار ءۇشىن قولايلى جاعداي جاساپ، ونىڭ ينفراقۇرىلىمىن دامىتۋ بويىنشا ناقتى شارالار قابىلدانعان. بيىل جەرگىلىكتى بيۋدجەتتەن 1 ملرد تەڭگە ءبولىنىپ، كول جاعالاۋىنداعى قابانباي اۋىلىندا قۇتقارۋ ستانسياسى جانە ءورت ءسوندىرۋ دەپوسىنىڭ قۇرىلىسى باستالعان. سونداي-اق، جاڭا ەلەكتر جەلىسىن تارتۋ، قاتتى تۇرمىستىق قالدىقتار پوليگونىن سالۋ بويىنشا جوبالىق-سمەتالىق قۇجاتتاما ازىرلەنىپ جاتىر.
"جوبالاردى جۇيەلى تۇردە جانە ساپالى ىسكە اسىرۋ ءۇشىن كول جاعالاۋىنىڭ جاڭا باس جوسپارىنىڭ جوباسىن ازىرلەۋ جۇمىستارى جۇرگىزىلىپ جاتىر. جالپى اۋدانى 1000 گەكتاردان اساتىن دەمالىس جانە تۋريزم ايماقتارىن قالىپتاستىرۋ، قوعامدىق جانە تۇرعىن اۋماقتاردى دامىتۋ كوزدەلگەن"، - دەدى اباي وبلىسىنىڭ اكىمى بەرىك ءۋالي وكق-دا وتكەن باسپا ءسوز كونفەرەنسياسىندا.
ونىڭ ايتۋىنشا، جوبانى ىسكە اسىرۋدىڭ ناتيجەسىندە قابانباي اۋىلىنىڭ اۋماعى مەن كول جاعالاۋىن بىرىكتىرىپ، يگەرىلگەن جەر كولەمىن 3 مىڭ گەكتارعا دەيىن ۇلعايتۋ جوسپارلانعان.
"بولاشاقتا بۇل الاكولدى ءوڭىردىڭ جەتەكشى تۋريستىك ورتالىقتارىنىڭ بىرىنە اينالدىرۋعا مۇمكىندىك بەرەدى"، - دەدى اكىم.
