وتكەن جىلى باستالعان كول جاعالاۋىن نىعايتۋ جۇمىستارى اعىمداعى جىلى اياقتالىپ، ناتيجەسىندە الاكولدىڭ ۇزىندىعى 13،55 شاقىرىم جاعالاۋى (اقشي اۋىلىنىڭ 10،150 شاقىرىمى مەن كوكتۇما اۋىلىنىڭ 3،4 شاقىرىمى) بيىكتىگى 3 مەترلىك تولقىندارعا توتەپ بەرەتىن قورعانىس بوگەتتەرىمەن بەكىتىلەتىن بولادى.
اتقارىلاتىن جۇمىستاردى تارقاتار بولساق:
كولدىڭ ليتوديناميكالىق جۇيەسىن ساقتاي وتىرىپ، جاعالاۋدىڭ ودان ءارى بۇزىلۋىن بولدىرماۋ جانە وسى اۋماقتىڭ رەكرەاسيالىق تارتىمدىلىعىن ارتتىرۋ ماقساتىندا، اقشي مەن كوكتۇماداعى عيماراتتار مەن قۇرىلىستاردى پايدالانۋ كەزىندەگى قاۋىپسىزدىكتى قامتاماسىز ەتۋ جوباسى ىسكە اسىرىلاتىن بولادى. جوبا نەگىزىندە جاساندى جاعاجايلار قۇرىلىپ، كولدىڭ جاعالاۋى نىعايتىلادى. ال جاياۋ جۇرگىنشىلەر جاعالاۋىنىڭ قۇرىلىسى اقشي مەن كوكتۇما اۋماعىندا ورنالاسقان دەمالىس ايماقتارىنىڭ رەكرەاسيالىق الەۋەتى مەن تارتىمدىلىعىن ايتارلىقتاي جاقسارتا تۇسپەك. بۇل ءوز كەزەگىندە ايماقتىڭ ەكونوميكالىق دامۋى، سونداي-اق، الاكول ايماعىنداعى الەۋمەتتىك – ەكونوميكالىق جاعدايدى جاقسارتۋ بولىپ تابىلادى.
جاعالاۋداعى قورعانىس بوگەتى بيىكتىگى 3 مەترلىك تولقىندارعا توتەپ بەرۋگە ارنالعان. بۇل جاساندى بوگەت مالتاتاس جاعاجايىنىڭ قالىپتاسۋىنا بايلانىستى بولماق. جاساندى مالتاتاس جاعاجاي – بۇل ەڭ ءتيىمدى جانە قىمبات ەمەس جاعالاۋدى نىعايتۋ قۇرىلىمى بولىپ سانالادى. سونىمەن قاتار، جاعالاۋ ايماعىندا تابيعي سۋ الماسۋ ساقتالادى، سۋ ءوزىنىڭ تازالىعى مەن مولدىرلىگىن ساقتايدى.
وسى تۇستا ايتا كەتەتىن بولساق، بۇگىندە ايدىندى الاكولدە 264 دەمالىس ورنى جۇمىس ىستەيدى. ولار كۇنىنە 23 366 ءتۋريستى قابىلداپ، قىزمەت كورسەتۋگە قاۋقارلى. مامانداردىڭ ايتۋىنشا، دەمالۋشىلاردىڭ سانى 798،5 مىڭ ادامعا جەتىپ وتىر. دەمالۋشىلارعا 4 ملرد. 790 ملن. تەڭگەنىڭ قىزمەتى كورسەتىلگەن.
