تۋريستىك ماۋسىم باستالعاننان بەرى الاكول كولىنە ميلليوننان استام ادام كەلەدى، بۇل سان كۇن سايىن ارتىپ كەلەدى. بۇگىنگى تاڭدا كولدىڭ جاعالاۋىنداعى تازالىق پەن ءتارتىپ باستى نازارعا الىنعان.
– وتكەن جىلى الاكولگە 750 مىڭ تۋريست كەلگەن. ال بيىل قىزىعۋشىلاردىڭ سانى 1 ملن. 33 مىڭنان استى. ءتارتىپ ساقشىلارى سولاردىڭ 50-ىنە تۇرمىستىق قالدىقتاردى بەي-بەرەكەت تاستاعانى ءۇشىن حاتتاما تولتىرعان. ولاردىڭ 12-ىنە ايىپپۇل سالىنسا، بىرەۋى بەس كۇندىك قاماۋعا الىندى. قالعان 38ء-ى ابباتتاندىرۋ بويىنشا ەسكەرتۋ العان، – دەيدى ىرعايتى اۋىلدىق وگرۋگىنىڭ ۋچاسكەلىك ينسپەكتورى ەرىك سەرىك ۇلى.
الاكول اۋدانىنداعى اقشي مەن كوكتۇما اۋىلدارىنا قاراستى جاعاجايدىڭ ۇزىندىعى 15 شاقىرىم. بيىل جاز ماۋسىمى كەش باستالعانىنا قاراماستان وسى ايماقتاعى سانيتارلىق تازالىق جۇمىستارىمەن «الاكول تازالىق» قىزمەتكەرلەرى جۇمىستارىن 10-شى ماۋسىمدا باستاپ كەتكەن. ويتكەنى كولگە كەلەتىن تۇراقتى قوناقتار ءۇشىن بارلىق جاعداي جاساۋ ماڭىزدى. سوندىقتان كوممۋنالدىق قىزمەتكەرلەر كول جاعالاۋىندا حالىققا قىزمەت كورسەتۋ ماقساتىندا تىنىمسىز جۇمىس ىستەيدى. جالپى جاعاجايدا 40 شاقتى تۇرمىستىق قالدىق جينايتىن جاشىك ورناتىلعان. ولاردان ءار كۇن سايىن 2 مىڭ توننادان استام قوقىس شىعارىلادى. كول جاعالاۋىندا 10 ادام جانە 5 تەحنيكا جۇمىس اتقارۋدا.
جاعالاۋداعى وزەكتى ماسەلەلەر كەلەسى جىلى تولىقتاي ءوز شەشىمىن تاپپاق. 2019-2020 جىلدار ارالىعىندا اقشي اۋىلىندا جانە كول جاعاسىندا كارىز جۇيەلەرى تارتىلادى. سونداي-اق، «الاكول تازالىق» كوممۋنالدىق كاسىپورىنىنىڭ فيليالىن اشۋ كوزدەلىپ وتىر. ول ءۇشىن بيۋدجەتتەن 390 ملن قارجى قاراستىرىلعان. قارجىعا 9 ارنايى تەحنيكا ساتىپ الىنادى.سونىمەن قاتار قوقىس جاشىكتەرىن 250-گە جەتكىزۋ كوزدەلىپ وتىر.
بالجان جۇمانبەكوۆا
