قوستانايدان جەزقازعانعا 2025 جىلدىڭ مامىرىندا كوشىپ كەلگەن كوپبالالى انا اسەل ايتماعامبەتوۆا الەۋمەتتىك جەلىگە ايماقتاعى الەۋمەتتىك جانە تۇرمىستىق ماسەلەلەردى كوتەرگەن بىرنەشە بەينەجازبا جاريالاعان، دەپ حابارلايدى Dalanews.kz.
ءوزىنىڭ ۆيدەولارىندا ول اۋىز سۋدىڭ ساپاسىزدىعىن، وڭىردە ونكولوگ دارىگەردىڭ جوقتىعىن، ينفراقۇرىلىمنىڭ ناشارلىعىن، جۇمىسسىزدىق پەن ەڭبەككە ورنالاسۋداعى جەمقورلىقتى اشىق سىنعا العان. اسىرەسە، جەزقازعانداعى وبلىستىق كوپسالالى اۋرۋحانانىڭ مۇشكىل كۇيىن ەرەكشە اتاپ كورسەتكەن.
بەينەجازبالار جاريالانعان سوڭ، 18 ماۋسىم كۇنى اسەلدى پوليسيا باسقارماسىنا شاقىرىپ، «ءتۇسىندىرۋ جۇمىستارىن» جۇرگىزگەن. كەيىن بەلگىلى بولعانداي، وبلىس اكىمى كوپبالالى انانى الەۋمەتتىك جەلى ارقىلى جالعان اقپارات تاراتتى دەپ سوتقا بەرگەن. سوت اكىمنىڭ شاعىمىن نەگىزدى دەپ تانىپ، اسەل ايتماعامبەتوۆانى 495 مىڭ تەڭگە ايىپپۇل تولەۋگە مىندەتتەدى.
ايتماعامبەتوۆانىڭ ءوزى بۇل ايىپتى «ايماقتاعى وزەكتى ماسەلەلەردى اشىق جەتكىزگەنى ءۇشىن جاسالعان قىسىم» دەپ باعالاپ وتىر. الەۋمەتتىك جەلى قولدانۋشىلارى مەن قوعام بەلسەندىلەرى دە اكىمنىڭ ارەكەتىن ازاماتتىق پىكىر ءبىلدىرۋ قۇقىعىن شەكتەۋ دەپ قابىلدادى. ءقازىر الەۋمەتتىك جەلىدە كوپشىلىك اسەلدى قولداپ، اكىمدىك ارەكەتىنە نارازىلىق بىلدىرۋدە.
