Qostanaidan Jezqazǵanǵa 2025 jyldyń mamyrynda kóship kelgen kópbalaly ana Ásel Aitmaǵambetova áleýmettik jelige aimaqtaǵy áleýmettik jáne turmystyq máselelerdi kótergen birneshe beinejazba jariialaǵan, dep habarlaidy Dalanews.kz.
Óziniń videolarynda ol aýyz sýdyń sapasyzdyǵyn, óńirde onkolog dárigerdiń joqtyǵyn, infraqurylymnyń nasharlyǵyn, jumyssyzdyq pen eńbekke ornalasýdaǵy jemqorlyqty ashyq synǵa alǵan. Ásirese, Jezqazǵandaǵy oblystyq kópsalaly aýrýhananyń múshkil kúiin erekshe atap kórsetken.
Beinejazbalar jariialanǵan soń, 18 maýsym kúni Áseldi politsiia basqarmasyna shaqyryp, «túsindirý jumystaryn» júrgizgen. Keiin belgili bolǵandai, oblys ákimi kópbalaly anany áleýmettik jeli arqyly jalǵan aqparat taratty dep sotqa bergen. Sot ákimniń shaǵymyn negizdi dep tanyp, Ásel Aitmaǵambetovany 495 myń teńge aiyppul tóleýge mindettedi.
Aitmaǵambetovanyń ózi bul aiypty «aimaqtaǵy ózekti máselelerdi ashyq jetkizgeni úshin jasalǵan qysym» dep baǵalap otyr. Áleýmettik jeli qoldanýshylary men qoǵam belsendileri de ákimniń áreketin azamattyq pikir bildirý quqyǵyn shekteý dep qabyldady. Qazir áleýmettik jelide kópshilik Áseldi qoldap, ákimdik áreketine narazylyq bildirýde.
