ەلباسىمىز نۇرسۇلتان ءابىش ۇلى نازاربايەۆ بيىلعى ءداستۇرلى حالىققا ارناعان جولداۋىندا كەلەر جىلدى «جاستار جىلى» دەپ بەكىتىپ، «بولاشاق ۇرپاقتى، ءوز ەلىنىڭ ناعىز پاتريوتتارىن تاربيەلەپ وسىرۋدە تابيعاتتى ساقتاۋدىڭ جانە تۋعان جەردى قۇرمەتتەۋدىڭ ماڭىزدىلىعىن» ەرەكشە اتاپ وتكەن بولاتىن.

وسى ورايدا، ارىس قالاسىنداعى «دەندروساياباقتا» قالالىق ىشكى ساياسات ءبولىمى مەن «جاستار رەسۋرستىق ورتالىعى» كمم-نىڭ ۇيىمداستىرۋىمەن 2019 جىل «جاستار جىلى» اياسىندا جانە 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي، «اعاش ەك، گۇل ەك – تۋعان جەردى تۇلەت» اتتى اعاش ەگۋ اكسياسى ءوتتى.

اكسيا بارىسىندا كەلەر جىلدىڭ ماڭىزدىلىعىن ەسكەرە وتىرىپ، جاستاردىڭ باستاماسىمەن 2019 ءتۇپ اعاش كوشەتتەرىن وتىرعىزۋ جۇمىستارىن باستاپ، شارا بارىسىندا ءان ايتىپ، كوڭىلدى قۋانتار ازىلدەرىمەن قاتار قالامىزداعى كوللەدج ستۋدەنتتەرى فلەشموب ۇيىمداستىردى.

مۇنداي ءىس-شارالار ءاربىر ادامنىڭ ءوز جەرىنە ادالدىق، تۋعان جەرگە سۇيىسپەنشىلىكپەن قاراۋىمەن قوسا، ءوز ورتاسىن تازا ۇستاۋعا ۇيرەتسە كەرەك.

«بۇتاق جايعان اعاش قارتايمايدى، ۇرپاق جايعان ادام قارتايمايدى» دەگەن ناقىل ءسوزدى ۇستانعان قارتتارىمىز بەن قالا جاستارىمىزدىڭ بەلسەندىلىگىن كورسەتكەن ۇرپاقتار ساباقتاستىعى اياسىنداعى مۇنداي يگى شارالار الداعى ۋاقىتتا دا، جالعاسىن تاباتىن بولادى.

 

ارىس قالاسى اكىمىنىڭ باسپا ءسوز قىزمەتى