قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى باسشىسى قامشىبەك تاشييەۆكە رەسمي ايىپ تاعىلعان جوق. بۇل تۋرالى ادۆوكات شەردور ابدىكاپاروۆ مالىمدەدى، دەپ حابارلايدى Dalanews.kz.
ونىڭ ايتۋىنشا، بۇعان دەيىن الەۋمەتتىك جەلىدە جاريالانعان اقپارات ناقتى تۇجىرىمدالماعان. ادۆوكات باستاپقىدا قامشىبەك تاشييەۆكە، قۇرمانقۇل زۋلۋشيەۆكە جانە نۇرلانبەك تۇرعىنبەك ۋۋلۋعا قىلمىستىق ءىس اياسىندا ايىپ تاعىلعانى جونىندە جازبا جاريالاعان بولاتىن. كەيىن ول جازباسىن ءوشىرىپ، قاتەلىك جىبەرگەنىن ايتتى.
«رەسمي تۇردە ەشقانداي ايىپ تاعىلعان جوق. بۇرىنعى ساياساتكەرلەر ءىس اياسىندا تەك تەرگەۋگە شاقىرىلدى. بولاشاقتا ۇقساس ايىپتار تاعىلۋى مۇمكىن»، – دەدى ادۆوكات.
ول سونداي-اق جاريالانعان ۆيدەونى ويىن ناقتى جەتكىزە الماعاندىقتان وشىرگەنىن ءتۇسىندىردى.
بۇعان دەيىن ب ا ق پەن الەۋمەتتىك جەلىلەردە قامشىبەك تاشييەۆكە، قۇرمانقۇل زۋلۋشيەۆكە جانە نۇرلانبەك تۇرعىنبەكۋۋلۋعا جاپپاي تارتىپسىزدىك ىسىنە بايلانىستى اۋىر باپتار بويىنشا ايىپ تاعىلعانى جونىندە اقپارات تاراعان ەدى.
