"ادامدار الدانعانىن اۋەجايدا بىلگەن". قوستانايدا 70 ادامدى الداعان الاياق سوتتالدى

كوركەم الدابەرگەنوۆا 29 ءساۋ. 2024 09:41 4160

قوستاناي قالاسىنىڭ №2 سوتى 70 ازاماتتى الداپ، 78 ملن. تەڭگەسىن يەمدەنگەن جالعان تۋراگەنتتى سوتتادى، - دەپ حابارلايدى Dalanews.kz جوعارعى سوتقا سىلتەپ. 

ايىپتالۋشى ف.-عا ەكى جانە ودان دا كوپ ادامعا قاتىستى ءىرى مولشەردە بىرنەشە رەت جاسالعان الاياقتىق بويىنشا ايىپ تاعىلدى (قك 190-بابىنىڭ 3-بولىگى 1، 3، 4-تارماقتارى).

2021 جىلدىڭ ورتاسىنان باستاپ ف. جەكە كاسىپكەر رەتىندە شارتتىق قارىم-قاتىناستا بولعان جۇمىس ىستەپ تۇرعان تۋروپەراتورلاردىڭ تۋرپاكەتتەرىن ساتۋمەن اينالىسقان.

كليەنتتىك بازانى قالىپتاستىرىپ، ازاماتتاردىڭ سەنىمىنە يە بولعان ول كليەنتتەردىڭ اقشاسىن يەمدەنۋ ءۇشىن قىلمىستىق ارەكەتكە كىرىسەدى.

ف. 2022 جىلدىڭ ماۋسىم ايىنان 2023 جىلدىڭ ماۋسىم ايىنا دەيىن تۋراگەنت اتىن جامىلىپ، ازاماتتارعا تۋريستىك پاكەتتەرىن ۇسىنعان.

ءىس جۇزىندە ول ءوز مىندەتتەمەلەرىن ورىنداۋدى ماقسات ەتپەي، جاپونيا، ءباا، تۇركيا، دۋباي، مىسىر، تايلاند، ۆەتنام جانە باسقا دا ەلدەرگە بارۋ ءۇشىن تولەنگەن جابىرلەنۋشىلەردىڭ قاراجاتىن يەمدەنگەن.

ءىس بويىنشا جابىرلەنۋشىلەردىڭ ف.-عا قاتىستى ەشقانداي كۇدىگى بولماعان، ويتكەنى ولار بۇرىن ودان تۋرپاكەتتەر ساتىپ العان نەمەسە دوستارىنىڭ ۇسىنىسى بويىنشا كەلگەن، تۋريستىك ساپارلاردى الدىن الا تولىق تولەگەن.

ادەتتە، ول ازاماتتاردىڭ العان قاراجاتىن تولىعىمەن يگەرگەن. كوپتەگەن جابىرلەنۋشى بۇل تۋرالى تەك ۇشىپ شىققان كۇنى، كەيبىرى اۋەجايدا بىلەدى.

كەيبىر جابىرلەنۋشىلەرگە سەنىم ءبىلدىرۋ ءۇشىن جالعان تۋراگەنت قايتارعا بيلەتىن تولەمەي، تەك ءبىر جاقتاعى رەيستەر مەن تۇرۋ اقىسىن تولەگەن.

تۇركياعا كەلگەن ءبىر وتباسى ولاردىڭ تۇرۋى مەن قايتۋ رەيسىنىڭ اقىسى تولەنبەگەنىن ءبىلىپ قالعان.

ف.-عا تەرگەۋ امالدارى جۇرگىزىلىپ جاتقان كەزدە ونىڭ ءبىرى سىنىپتاسى ەكى ازاماتتى الداپ ۇلگەرگەن.

ونىڭ قىلمىستىق ارەكەتىنىڭ سالدارىنان 70-كە جۋىق جابىرلەنۋشىگە 78 ميلليون تەڭگەدەن استام ءىرى كولەمدەگى ماتەريالدىق شىعىن كەلتىرىلگەن.

ف.-نىڭ كىناسى مويىنداۋدان باسقا جابىرلەنۋشىلەردىڭ، كۋالاردىڭ ايعاقتارىمەن، بانك شوتىنان ءۇزىندى كوشىرمەلەرمەن، سونداي-اق باسقا دا ءىس ماتەريالدارىمەن دالەلدەندى.
 
تاراپتاردىڭ پوزيسياسى:

پروكۋرور سوتتالۋشىعا 4 جىلعا باس بوستاندىعىنان ايىرۋ جازاسىن تاعايىنداۋدى سۇرادى.

جابىرلەنۋشىلەردىڭ كوپشىلىگى ف.-عا كەلتىرىلگەن ماتەريالدىق شىعىندى وتەي الماعاندىقتان، ونى زاڭ شەڭبەرىندە قاتاڭ جازالاۋدى سۇرادى.

قورعاۋشى تاراپ ف.-عا باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇرادى.

ف.-نىڭ ءوزى كىناسىن تولىق مويىنداپ، جاساعان ىسىنە وكىنىپ، جابىرلەنۋشىلەرگە وتەماقى تولەۋگە مىندەتتەندى.
 
سوتتىڭ شەشىمى

جاسالعان ىس-ارەكەتتىڭ جەكە باسىن، سيپاتى مەن قوعامدىق قاۋىپتىلىك دارەجەسىن، ءىستىڭ بارلىق ءمان-جايلارىن، جابىرلەنۋشىلەرگە وتەلمەگەن زياننىڭ بولۋىن ەسكەرە وتىرىپ، سوت ف.-نى تۋريزم سالاسىنداعى قىزمەتپەن 6 جىلعا اينالىسۋ قۇقىعىنان ايىرا وتىرىپ، 4 جىلعا باس بوستاندىعىنان ايىرۋ تۋرالى ۇكىم شىعاردى.

ف.-نىڭ جاۋاپكەرشىلىگى مەن جازاسىن جەڭىلدەتەتىن ءمان-جايلارعا كىناسىن مويىنداۋ جانە جاساعان قىلمىسىنا شىن جۇرەكتەن وكىنۋ انىقتالدى، ءبىراق اۋىرلاتاتىن فاكتورلار انىقتالمادى.

جابىرلەنۋشىلەردىڭ ازاماتتىق تالاپتارى قاناعاتتاندىرىلدى.  ۇكىم زاڭدى كۇشىنە ەنگەن جوق.


ۇسىنىلعان
سوڭعى جاڭالىقتار