اباي ۋنيۆەرسيتەتىندە «عىلىمداعى سيفرلىق سەرپىلىس: جاساندى ينتەللەكت ءداۋىرى» تاقىرىبى اياسىندا وتكەن عىلىم دەكاداسىنىڭسالتاناتتى جابىلۋ ءراسىمى ءوتتى. عىلىم قىزمەتكەرلەرى كۇنىنە ورايلاستىرىلعان اۋقىمدى عىلىمي ءىس-شارادا ونكۇندىك قورىتىندىسى شىعارىلىپ، الداعى دامۋ باعىتتار ايقىندالدى. جيىن بارىسىندا عىلىم مەن ءبىلىم سالاسىنا ۇلەس قوسقان ۋنيۆەرسيتەت قىزمەتكەرلەرىنە ق ر عججب مينيسترلىگى تاراپىنان ماراپاتتار تابىس ەتىلدى، دەپ حابارلايدى Dalanews.kz
اباي اتىنداعى قازۇپۋ-دا 1-10 ءساۋىر ارالىعىندا وتكەن عىلىم دەكاداسى بارىسىندا 150-دەن استام ءىس-شارا ۇيىمداستىرىلعان. ولاردىڭ قاتارىندا حالىقارالىق عىلىمي كونفەرەنسيالار، يننوۆاسيالىق جوبالار مەن ستارتاپتار كورمەسى، روبوتوتەحنيكا جارىستارى، عىلىمي سەمينارلار، پاندىك وليمپيادالار، سونداي-اق وتاندىق جەتەكشى جانە شەتەلدىك عالىمداردىڭ قاتىسۋىمەن وتكەن كەزدەسۋلەر بار.
ونكۇندىك شەڭبەرىندە سيفرلىق تەحنولوگيالار مەن جاساندى ينتەللەكت باعىتىنداعى وزەكتى ماسەلەلەر قاراستىرىلىپ، عىلىم مەن ءبىلىم بەرۋ ۇدەرىستەرىنىڭ جاڭا تاسىلدەرى تالقىلاندى. ءىس-شارالار جاس زەرتتەۋشىلەردىڭ عىلىمي الەۋەتىن دامىتۋعا جانە ولاردىڭ زەرتتەۋ مادەنيەتىن قالىپتاستىرۋعا باعدارلاندى. ونىمەن قوسا، عىلىم دەكاداسىنا قازاقستاننىڭ بارلىق وڭىرلەرىنەن كەلگەن مەكتەپ وقۋشىلارى قاتىسىپ، ءوز عىلىمي جوبالارىن تانىستىردى. بۇل باستاما جاس بۋىننىڭ عىلىمعا قىزىعۋشىلىعىن ارتتىرىپ، ولاردىڭ كاسىبي باعدارىن ايقىنداۋعا ىقپال ەتتى.
سالتاناتتى جابىلۋ راسىمىندە ۋنيۆەرسيتەتتىڭ باسقارما توراعاسى-رەكتور بولات تىلەپ ءسوز سويلەپ، عىلىم دەكاداسىنىڭ مازمۇندىق دەڭگەيىنە جوعارى باعا بەردى. رەكتور ءوز سوزىندە ونكۇندىك اياسىندا عىلىم مەن ءبىلىمنىڭ، يننوۆاسيا مەن شىعارماشىلىقتىڭ ءوزارا بايلانىسىن ايقىندايتىن كەشەندى جۇمىستار جۇزەگە اسىرىلعانىن العا تارتتى.
– بۇگىن ءبىز ءبارىمىز ءۇشىن ماڭىزى زور، مازمۇنى باي، تاعىلىمى تەرەڭ ونكۇندىكتىڭ قورىتىندىسىندا باس قوسىپ وتىرمىز. دەكادا بارىسى تەك ءىس-شارالار جيىنتىعىمەن شەكتەلمەي، بولاشاق عىلىمنىڭ ىرگەتاسىن قالاۋعا باعىتتالعان جۇيەلى جۇمىستى ۇسىندى. ونكۇندىك اياسىندا مەكتەپ پەن جوعارى وقۋ ورنى اراسىنداعى بايلانىستى نىعايتۋعا كوزدەلگەن عىلىمي جوبالار كورمەسى، ءبىلىم بەرۋ الاڭدارى، ستارتاپتار مەن يننوۆاسيالىق باستامالار ۇيىمداستىرىلدى. بۇل – عىلىمعا بەت بۇرعان جاس بۋىننىڭ ناقتى جەتىستىكتەرى. بيىلعى دەكادانىڭ باستى ەرەكشەلىگى – سيفرلاندىرۋ مەن جاساندى ينتەللەكت تاقىرىپتارىنىڭ كەڭىنەن قامتىلۋى. اتالعان باعىتتاردا مازمۇندى پىكىر الماسۋلار جۇرگىزىلىپ، ۋنيۆەرسيتەتىمىزدىڭ ۋاقىت تالابىنا ساي دامىپ كەلە جاتقانى بايقالدى»، – دەءدى بولات اناپيا ۇلى.
دەكادا شەڭبەرىندە فيلولوگيا، پەداگوگيكا، پسيحولوگيا، ونەر، سپورت جانە جاراتىلىستانۋ باعىتتارىنداعى عىلىمي كونفەرەنسيالار مەن سەمينارلار وتكىزىلدى. سونىمەن قاتار جاس عالىمدار مەن ستۋدەنتتەرگە ارنالعان عىلىمي وليمپيادالار، TED talk فورماتىنداعى بايقاۋلار مەن عىلىمي-ينتەللەكتۋالدىق ويىندار وتكىزىلدى.
وسى ۋاقىت ارالىعىندا «Research Lab Day» فورماتىنداعى زەرتحانالار تانىستىرىلىمى، عىلىمي كىتاپحانانىڭ اشىق ەسىك كۇندەرى جانەTOP-time سەمينارلارعا گەرمانيا، رەسەي فەدەراسياسى جانە جۇڭگو ەلدەرىنەن كەلگەن عالىمدار قاتىستى. سونداي-اق ساراپشىلار زاماناۋي زەرتتەۋ ادىستەرى، سيفرلىق تەحنولوگيالار مەن جاساندى ينتەللەكتتى ءبىلىم بەرۋ جانە عىلىم سالاسىندا قولدانۋ باعىتىندا مازمۇندى باياندامالار جاسالعان.
جابىلۋ سالتاناتىندا عىلىمدى دامىتۋعا ەلەۋلى ۇلەس قوسقان ۋنيۆەرسيتەت وقىتۋشىلارى مەن قىزمەتكەرلەرى ماراپاتتارمەن ماراپاتتالدى. ءتىل ساياساتىن دامىتۋعا ەرەكشە ۇلەس قوسقانى جانە تىلدەردى دامىتۋ سالاسىن جەتىلدىرۋگە بەلسەندى اتسالىسقانى ءۇشىن «انا ءتىلىن دامىتۋعا قوسقان ۇلەسى ءۇشىن» توسبەلگىسى بەرىلدى. ولاردىڭ قاتارىندا فيلولوگيا عىلىمدارىنىڭ كانديداتى، شىعىس فيلولوگياسى جانە اۋدارما كافەدراسىنىڭ اعا وقىتۋشىسى ەلەونورا كانسەيتوۆا مەن تاريح عىلىمدارىنىڭ كانديداتى، ەجەلگى جانە ورتا عاسىرداعى قازاقستان تاريحى كافەدراسىنىڭ دوسەنتى بيبىگۇل ابەنوۆا بار.
سونىمەن قاتار، ق ر عىلىم جانە جوعارى ءبىلىم مينيسترلىگىنىڭ «عىلىم ۇزدىگى» قۇرمەت ديپلومى، «قۇرمەت» گراموتاسى جانە العىس حاتى ۋنيۆەرسيتەت عالىمدارى مەن وقىتۋشى-پروفەسسورلار قاۋىمىنا تابىستالدى.
