بۇگىن اباي ۋنيۆەرسيتەتىندە «بوس ورىندار جارمەڭكەسى» بولىپ ءوتتى. ماقساتى – جوعارى وقۋ ورنىن ءتامامداعالى وتىرعان تۇلەكتەردى جۇمىس بەرۋشىلەرمەن تىكەلەي بايلانىستىرىپ، ولاردىڭ كاسىبي باعدارىن ايقىنداۋعا كومەكتەسۋ. جارمەڭكەدە 250-جۋىق مەكەمە جاس ماماندارعا ارنالعان بوس جۇمىس ورىندارىن ۇسىنىپ، بولاشاق پەداگوگتاردى وزدەرىنە جۇمىسقا شاقىردى، دەپ حابارلايدى Dalanews.kz.
اباي ۋنيۆەرسيتەتىندە جۇمىس بەرۋشىلەرمەن سەرىكتەستىك جىلدان-جىلعا نىعايىپ كەلە جاتىر. ماسەلەن، ۋنيۆەرسيتەت بىلتىر 64 مەكەمەمەن مەموراندۋمعا وتىرسا، بيىل بۇل كورسەتكىش 78-گە جەتكەن. سونىمەن قاتار 175 ءبىلىم بەرۋ ۇيىمىمەن تۇراقتى كەلىسىمشارت نەگىزىندە تاجىريبە بازاسى رەتىندە جۇمىس ىستەيدى. بۇل – ساپالى مامان دايارلاۋداعى ناقتى ناتيجە.
جۇمىس بەرۋشىلەر وزدەرىنە قاجەتتى ساپالى كادر تاڭداۋدا وسىنداي ءىس-شارالاردىڭ ماڭىزدى ەكەنىن ايتادى. سولاردىڭ ءبىرى ۋنيۆەرسيتەت كەشەگى تۇلەگى، بۇگىنگى الماتى قالالىق №171 مەكتەپتىڭ ديرەكتورى نۇرداۋلەت سەرىك ۇلى:
– ءبىز وسى ءبىلىم ورداسىندا ساپالى ءبىلىم مەن تاعىلىمدى تاربيە الدىق. ۇستازداردان ۇيرەنگەنىمىز كاسىبي ومىرىمىزدە ۇلكەن ءرول اتقاردى. تابىسقا جەتۋدىڭ باستى جولى – ادال ەڭبەك پەن ۇزدىكسىز ىزدەنىس، – دەيدى.
بوس جۇمىس ورىندار جارمەڭكەسىنە ەلىمىزدىڭ تۇكپىر-تۇكپىرىنەن كەلگەن 250-گە جۋىق مەكەمە قاتىستى. ولاردىڭ قاتارىندا مەكتەپتەر، كوللەدجدەر، بالاباقشالار مەن ءبىلىم بەرۋ ۇيىمدارى بار. جۇمىس بەرۋشىلەر جارمەڭكەدە ءتۇرلى باعىتتاعى 1214 بوس جۇمىس ورنىن ۇسىندى.
ءىس-شارا اياسىندا «mansap-bosoryn.kz» سيفرلىق پلاتفورماسى تانىستىرىلىپ، تۇلەكتەرگە ونلاين تۇردە جۇمىسقا ءوتىنىم بەرۋ مۇمكىندىگى ءىس جۇزىندە كورسەتىلدى مۇندا بوس جۇمىس ورىندارى جاريالانىپ، ءبىتىرۋشى تۇلەكتەر تىكەلەي ءوتىنىم بەرە الادى. جىبەرىلگەن وتىنىمدەر بىردەن جۇمىس بەرۋشىنىڭ ەلەكتروندى پوشتاسىنا جانە WhatsApp بايلانىس نومىرىنە جولدانادى. سول ارقىلى جۇمىسقا ورنالاسۋ ۇدەرىسى جەدەل، اشىق ءارى ءتيىمدى فورماتتا جۇرگىزىلەدى.
ايتا كەتەيىك، بيىل اباي ۋنيۆەرسيتەتىن باكالاۆريات دەڭگەيىندە 81 ءبىلىم بەرۋ باعدارلاماسى بويىنشا 2800 ستۋدەنت ءتامامدايدى. ولاردىڭ باسىم كوپشىلىگى شەت ءتىلى، قازاق ءتىلى مەن ادەبيەتى جانە دەنە شىنىقتىرۋ ءپانىنىڭ مۇعالىمدەرى. ال 52 ماماندىقپەن 688 ءبىلىم الۋشى ماگيستر عىلىمي دارەجەسىن الىپ، ەڭبەك نارىعىنا جول تارتپاق. ءبىتىرۋشى تۇلەكتەردىڭ شامامەن 70 پايىزى مەملەكەتتىك ءبىلىم گرانتى نەگىزىندە وقىعان.
