اباي وبلىسىندا جاستار ءۇشىن شاعىن گرانتتار كونكۋرسى – «ZHAS PROJECT» جوباسى باستالدى. وڭىرگە 8 گرانت بولىنگەن. وتىنىمدەردى قابىلداۋ 25 ناۋرىزدا باستالىپ، ءبىر ايعا سوزىلادى. بۇل تۋرالى كونكۋرستى ۇيىمداستىرۋشىلار مەن «اباي جاستارى» جاستار رەسۋرستىق ورتالىعىنىڭ ءبولىم باسشىسى ەرسىنبەك ورلەۋبەك حابارلادى، – دەپ حابارلايدى Dalanews.kz.

– 19 اقپاننان 24 ناۋرىزعا دەيىن ىنتالى قاتىسۋشىلار ءۇشىن اقپاراتتىق ناۋقان وتكىزىلەدى. ال 25 ناۋرىزدا وتىنىمدەردى قابىلداۋ باستالادى.

«ZHAS PROJECT» جوباسى جاستار اراسىندا كاسىپكەرلىك داعدىلاردى دامىتۋعا باعىتتالعان. جوباعا شالعاي اۋىلدارداعى حالىقتىڭ الەۋمەتتىك وسال توپتارى مەن جاستارعا ارتىقشىلىق بەرە وتىرىپ، 18-35 جاس ارالىعىنداعى قازاقستاندىقتار قاتىسا الادى.

ۇزدىك الەۋمەتتىك جوبالاردى كونكۋرستىق كوميسسيا تاڭدايدى. العاشقى قادام، ءوتىنىش بەرۋ – يدەيانى انىقتاۋ، سايتتا ساۋالناما تولتىرۋ www.zhasproject.com، قۇجاتتاردى تىركەپ، بيۋدجەت قۇرىپ، شاعىن گرانتتار كونكۋرسىنا قاتىسۋعا ءوتىنىم بەرەسىز، – دەپ ناقتىلادى Zhas Project جوباسىنىڭ ۇيلەستىرۋشىسى ەلزيرا ءجۇنىسوۆا.

كونكۋرس تالاپتارىنا سايكەس ۇمىتكەرلەر ايماقتا تۇراتىن جۇمىسسىز جاستار بولۋى كەرەك. جوبا جەڭىمپازدارى 1 ميلليون تەڭگەگە دەيىن قاراجاتقا جانە تالىمگەرلەردىڭ قولداۋىنا يە بولادى. جاستارعا جوبالارىن ىسكە اسىرۋعا ءتورت اي بەرىلەدى.

سپيكەرلەردىڭ ايتۋىنشا، شاعىن گرانتتاردى ىسكە اسىرۋ بارىسىندا جاستارعا ۇيىمداستىرۋشىلىق جانە كونسۋلتاسيالىق قولداۋ كورسەتىلەتىن بولادى. سونداي-اق بىلىكتى جاتتىقتىرۋشىلار، تالىمگەرلەر جانە الەۋمەتتىك جوبالاردى دامىتۋ جونىندەگى ماماندار شاقىرىلادى.