اباي وبلىسىن گازداندىرۋ ماسەلەسى ماجىلىستە قارالدى، دەپ حابارلايدى Dalanews.kz.

پارلامەنت ءماجىلىسىنىڭ جالپى وتىرىسىندا گازبەن جابدىقتاۋعا قاتىستى زاڭ جوباسى تالقىلانىپ، ءبىرىنشى وقىلىمدا ماقۇلداندى.

دەپۋتات نۇرتاي سابيليانوۆ ەنەرگەتيكا مينيسترلىگىنە اباي وبلىسىنداعى ەلدى مەكەندەردى گازداندىرۋ تۋرالى سۇراق قويدى. ونىڭ ايتۋىنشا، بۇل ماسەلە حالىقپەن كەزدەسۋلەردە ءجيى كوتەرىلەدى.

"اباي وبلىسىن الىپ قارايتىن بولساق، ءبىر دە ءبىر ەلدىمەكەن گازبەن قامتاماسىز ەتىلمەگەن. التى ايدان اسا ۋاقىت قىس بولادى، حالىق ءۇيىن جىلىتۋ ءۇشىن كومىر قولدانادى، ياعني قورادان شەلەككە سالادى، پەشكە جاعادى، قايتا كۇلىن شىعارادى. وتە قيىن حالىققا. ءجيى كوتەرەدى بۇل ماسەلەنى جانە دە كومىردىڭ باعاسى ءبىر تونناسى ءقازىر 30-34 مىڭ بولىپ كەتتى. وتكەن جولى باقتى اۋىلىنا بارعان كەزدە، حالىقپەن كەزدەسكەن كەزدە كومىردىڭ باعاسى 34 مىڭ تەڭگە بولعانىن جەتكىزدى. شەكارا ماڭىنداعى اۋىل. ارينە، اۋىلدا حالىققا قيىن بولعاندىقتان دا كوشە باستايدى. اباي وبلىسىنىڭ كورشى وبلىسى بار، جەتىسۋ وبلىسى. ءۇشارالعا دەيىن گاز تارتىلىپ جاتىر. ارجاعىندا اباي وبلىسى ءجۇز-اق شاقىرىم جەر. نەگە ءۇشارالدان اباي وبلىسىنا ءارى قاراي تارتپاسقا؟! قازاقستان - ءبىرتۇتاس مەملەكەت، وڭىرلەرگە، حالىققا بىردەي جاعداي جاسالۋى كەرەك"، - دەدى ول.

ايتا كەتەيىك، بىلتىر رەسپۋبليكا بويىنشا 95 ەلدى مەكەنگە گاز تارتىلىپ، 350 مىڭ ادام يگىلىگىن كورگەن. وسىلايشا تابيعي گاز تارتۋ جۇمىستارىنىڭ دەڭگەيى 64 پايىزعا جەتتى. دەسە دە سولتۇستىك قازاقستان، پاۆلودار، اباي جانە شىعىس قازاقستان وبلىستارىندا ءالى دە ماسەلە ۋشىعىپ تۇر.