اباي وبلىسىندا 226 مىڭنان استام بالا ءبىلىم الاتىن 561 ءبىلىم بەرۋ مەكەمەسى جۇمىس ىستەيدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا وبلىستىق ءبىلىم باسقارماسىنىڭ باسشىسى نۇرجان احمەتقالييەۆ مالىمدەدى.
- سەمەي قالاسىندا بيىل مەكتەپكە دەيىنگى ءبىلىم بەرۋ ساپاسىن ارتتىرۋ جانە بالالاردى تولىق قامتۋ ماقساتىندا 2 جەكەمەنشىك بالاباقشا اشىلىپ، 183 جاڭا ورىن پايدالانۋعا بەرىلدى. سونىمەن قاتار قولدانىستاعى مەكتەپكە دەيىنگى مەكەمەلەردىڭ سىيىمدىلىعى 1466 ورىنعا ۇلعايتىلدى. 2027 جىلعا دەيىن مەملەكەتتىك-جەكەمەنشىك ارىپتەستىك اياسىندا 2100 ورىنعا ارنالعان 9 بالاباقشا سالۋ جوسپارلانعان. بۇدان بولەك، وبلىستاعى 8700 وقۋشىنىڭ ورىن تاپشىلىعى ماسەلەسى 4 جايلى مەكتەپ پەن 6 شاعىن جيناقتى مەكتەپتىڭ قۇرىلىسى ارقىلى شەشىلەتىن بولادى، – دەپ مالىمدەدى ءبىلىم باسقارماسىنىڭ باسشىسى.
«جايلى مەكتەپ» ۇلتتىق جوباسى اياسىندا ءتورت مەكتەپتىڭ قۇرىلىسى قارقىندى جۇرگىزىلۋدە. قوسىمشا ءبىلىم بەرۋدى دامىتۋ ماقساتىندا كوپفۋنكسيونالدى وقۋشىلار سارايىنىڭ قۇرىلىسى باستالىپ، ونى 2025 جىلى پايدالانۋعا بەرۋ جوسپارلانعان. سونىمەن قاتار اباي اۋدانىندا 40 ورىندىق بالالارعا ارنالعان جازعى لاگەر سالىنۋدا.
- ءبىلىم سالاسىنا جەكە ينۆەستيسيالار تارتۋ ناتيجەسىندە بيىل وبلىس ورتالىعىندا «KAZ Minerals Management» كومپانياسىنىڭ قارجىلاندىرۋىمەن 1200 ورىندىق IT مەكتەپ اشىلدى. سونىمەن قاتار تەحنيكالىق جانە كاسىپتىك ءبىلىم بەرۋ سالاسىن دامىتۋ ماقساتىندا IT جانە جاڭا تەحنولوگيالار جوعارى كوللەدجى ءوز جۇمىسىن باستادى. قىركۇيەك ايىندا «قاراجىرا» اق-نىڭ جەكە ينۆەستيسيالارى ەسەبىنەن م.و. اۋەزوۆ اتىنداعى پەداگوگيكالىق كوللەدجدە 300 ورىندىق كونسەرت زالى پايدالانۋعا بەرىلدى، – دەدى نۇرجان احمەتقالييەۆ.
سپيكەردىڭ ايتۋىنشا، ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسىن نىعايتۋ ماقساتىندا 46 مەكتەپكە 48 جاڭا پاندىك كابينەت ساتىپ الىنىپ، 320 ينتەراكتيۆتى پانەل ورناتىلعان. «قازاقستان حالقىنا» قورىنىڭ قولداۋىمەن 4 تىرەك مەكتەپتە جالپى سوماسى 1 ملرد تەڭگەگە جاڭعىرتۋ جۇمىستارى جۇرگىزىلدى. سونىمەن قاتار اۋىلدىق 127 مەكتەپتە Starlink جۇيەسى قوسىلىپ، ينتەرنەت جىلدامدىعى 4 مبيت/س-تەن 100-200 مبيت/س-كە دەيىن ارتقان.
اباي وبلىسىندا بالالاردى ساپالى بىلىممەن، زاماناۋي ينفراقۇرىلىممەن قامتاماسىز ەتۋ باسىمدىقتاردىڭ ءبىرى بولىپ قالا بەرەدى. 2024 جىلى قول جەتكىزگەن جەتىستىكتەر وبلىستىڭ ءبىلىم سالاسىنداعى بولاشاعى جارقىن ەكەنىن ايعاقتايدى. 2025 جىلدا وسى باعىتتاعى جۇمىستار جالعاسادى.