بۇگىن وبلىس اكىمى بەرىك ءۋالي «Xinjiang Huayuan Holding Group Co. Ltd» كورپوراسياسىنىڭ باس ديرەكتورى لي سزيۋن باستاعان دەلەگاسيامەن كەزدەستى،- دەپ حابارلايدى Dalanews.kz

كەزدەسۋ بارىسىندا ەكى جاقتى ينۆەستيسيالىق ىنتىماقتاستىقتى نىعايتۋ، بىرلەسكەن جوبالاردى ىسكە اسىرۋ جانە جاڭا ءوندىرىس الاڭدارىن دامىتۋ ماسەلەلەرى تالقىلاندى.

ايماق باسشىسى اباي وبلىسى دەلەگاسياسىنىڭ شىڭجاڭ ۇيعىر اۆتونوميالىق اۋدانىنا جۇمىس ساپارى بارىسىندا ناتيجەلى كەلىسسوزدەر جۇرگىزىپ، كوپتەگەن مەموراندۋمدارعا قول قويعانىن اتاپ ءوتتى.

«وسى ساپار اياسىندا اباي وبلىسىنىڭ دەلەگاسياسى ءۇرىمشى قالاسىنداعى ءسىزدىڭ كاسىپورنىڭىزعا بارىپ، وندىرىستىك ۇدەرىستەرمەن جانە جۇزەگە اسىرىلىپ جاتقان جوبالارمەن تانىستى. قازىرگى ۋاقىتتا وبلىستىڭ ەكونوميكالىق الەۋەتىن ارتتىرۋ ءۇشىن ينۆەستورلارمەن جۇيەلى جۇمىس جۇرگىزىلىپ جاتىر. سەمەي قالاسىنداعى «ءوندىرىس» يندۋستريالىق ايماعىنىڭ اۋماعىن 600 گەكتارعا دەيىن كەڭەيتۋدى كوزدەپ وتىرمىز»، - دەدى وبلىس اكىمى.

«Xinjiang Huayuan Holding Group Co.Ltd» كورپوراسياسى – تۇرعىن ءۇي قۇرىلىسىمەن، شىعىس مەديسيناسىندا قولدانىلاتىن دارى-دارمەك وندىرۋمەن جانە جىلۋمەن قامتاماسىز ەتۋ نىساندارىن سالۋمەن اينالىساتىن قىتايداعى جەتەكشى كومپانيالاردىڭ ءبىرى.

كورپوراسيانىڭ باس ديرەكتورى لي سزيۋن وسى سالالار بويىنشا اباي وبلىسىمەن بىرلەسە جۇمىس ىستەۋگە دايىن ەكەنىن جەتكىزدى.

«ءبىزدىڭ دەلەگاسيا سەمەي قالاسىندا بوي كوتەرەتىن جاڭا ىقشام اۋداننىڭ جوباسىمەن تانىستى. قىتايعا بارعان سوڭ ارنايى جۇمىس توبىن قۇرىپ، ناقتى جوبالاردى ۇسىنامىز. ينفراقۇرىلىم ماسەلەسى شەشىلسە، جۇمىسقا كىرىسۋگە دايىنبىز»، - دەدى ول.

وبلىس اكىمى جاڭا ىقشام اۋداننىڭ ينفراقۇرىلىم ماسەلەسى جاقىن ارادا شەشىلەتىنىن، قۇرىلىس جۇمىستارىن باستاۋعا ەشقانداي كەدەرگى بولمايتىنىن ايتتى.

«سەمەي قالاسىندا سالىناتىن جاڭا اكىمشىلىك-ىسكەرلىك ورتالىقتى كەشە ارنايى بارىپ، كوردىڭىزدەر. اۋماعى 1000 گەكتاردى قامتيتىن، جاڭا اكىمشىلىك-ىسكەرلىك اۋماقتىڭ ۇزاق مەرزىمدى تۇجىرىمداماسى ازىرلەنىپ، تەحنيكالىق ەكونوميكالىق نەگىزدەمەسى جاسالۋدا. سەمەي قالاسىنا كوپ فۋنكسيالى، زاماناۋي ءقوناقۇي قاجەت. جاڭا ىقشام اۋدانعا جاڭا جىلۋ قازاندىعى، كوپ قاباتتى تۇرعىن ۇيلەر كەرەك. سىزدەردى «Smart City» جوباسىنا سەرىكتەس رەتىندە قاتىسۋعا، جاڭا قالانى بىرگە سالۋعا شاقىرامىز. ءسىز باسقاراتىن كورپوراسيانىڭ زاماناۋي تۇرعىن ءۇي قۇرىلىسى، جىلۋمەن جابدىقتاۋ سالاسىندا تاجىريبەسى مول. سوندىقتان ناقتى ۇسىنىستار كۇتەمىز»، - دەدى ايماق باسشىسى.