الماتى اكىمى دارحان ساتىبالدى كۇزگى اعاش وتىرعىزۋ، كوشەلەردى سانيتارلىق تازالاۋ جانە قالالىق ورتانى اباتتاندىرۋدىڭ جاڭا ستاندارتتارىن ەنگىزۋ بويىنشا كەڭەس وتكىزدى،- دەپ حابارلايدى Dalanews.kz
جوسپارعا سايكەس، كۇزگى كەزەڭدە مەگاپوليستە 53 مىڭنان استام اعاش وتىرعىزۋ كوزدەلىپ وتىر، ونىڭ ىشىندە بيىكتىگى 4-5 مەتر بولاتىن 9،3 مىڭ ءىرى اعاش بار. سونىمەن قاتار، كەسىلگەن اعاشتىڭ ورنىنا 22 مىڭنان استام تال ەگۋ جانە 356 مىڭ بۇتاقتان تۇراتىن بۋفەرلىك جاسىل ايماقتار قۇرۋ جوسپارلانعان. الاتاۋ، ناۋرىزباي جانە جەتىسۋ اۋداندارىنا ەرەكشە نازار اۋدارىلادى. جۇمىستار اۆتوماتتى سۋارۋ جۇيەسىن ورناتۋ جونىندەگى بۇرىن ازىرلەنگەن جوسپارعا (52 ۋچاسكە، 290 كم) جانە ازىرلەنىپ جاتقان دەندرولوگيالىق جوسپارعا سايكەس جۇرگىزىلەدى. قالالىق ءتالىمباق قۇرۋعا دايىندىق جۇمىستارى جالعاسىپ جاتىر، جوبالىق جۇمىستاردى 2026 جىلدىڭ سوڭىنا دەيىن اياقتاۋ جوسپارلانعان.
كوشەلەر مەن قوعامدىق كەڭىستىكتەردى كەشەندى اباتتاندىرۋ باعدارلاماسى ۇسىنىلدى. باعدارلامانىڭ نەگىزگى ەلەمەنتى رەتىندە سكۆەرلەر، بۋلۆارلار، جاياۋ جۇرگىنشىلەر كوشەلەرى مەن شاعىن جاسىل ايماقتاردى كۇتىپ-ۇستاۋمەن ورتالىقتاندىرىلعان تۇردە اينالىساتىن «جاسىل الماتى» كمم-ىن قۇرۋ كوزدەلىپ وتىر. باعدارلاما اياسىندا اباتتاندىرۋ مەن كوگالداندىرۋ بويىنشا ءبىرىڭعاي ستاندارتتار ەنگىزىلەدى.
لاندشافتىق ديزايندى دامىتۋعا، كوپجىلدىق وسىمدىكتەر ۇلەسىن ارتتىرۋعا، اۆتوماتتى سۋارۋ جانە جارىقتاندىرۋ جۇيەلەرىن ەنگىزۋگە، سونداي-اق، جايلى ءارى ءقاۋىپسىز قالالىق ورتا قۇرۋعا ەرەكشە نازار اۋدارىلادى.
سونىمەن بىرگە، سانيتارلىق تازالاۋدىڭ ءبىرىڭعاي رەگلامەنتى ازىرلەنۋدە. قۇجاتتا جۇمىستاردىڭ ساپاسىنا قويىلاتىن ناقتى تالاپتار، قولمەن جانە تەحنيكامەن تازالاۋ كولەمىنىڭ ەسەبى، قىزمەتكەر سانىنا قاتىستى نورماتيۆتەر مەن ولارعا ىڭعايلى ەتىپ بەيىمدەلگەن جاڭارتىلعان كەستە قامتىلادى.
قالا اكىمى دارحان ساتىبالدى بولىنگەن قاراجاتتىڭ ماقساتتى پايدالانىلۋىنا باقىلاۋدى كۇشەيتۋدى تاپسىردى. ونىڭ ايتۋىنشا، ەگەر اباتتاندىرۋعا اقشا بولىنسە، وندا ول بويىنشا ناقتى ناتيجە بولۋعا ءتيىس.
«مەردىگەرلەر مەن ۆەدومستۆولىق مەكەمەلەر جۇمىستى ناقتى اتقارۋى كەرەك. كوپ جەردە سۋارۋ جۇيەسى ىستەمەيدى، جەر تەلىمى قىزمەت كورسەتىلەتىن ايماق رەتىندە تىركەلگەنىمەن، ءىس جۇزىندە كۇتىم جاسالمايدى. مۇنى تۇزەۋ قاجەت. اۋدان اكىمدىكتەرى ارقىلى بولىنەتىن قارجى قاتاڭ باقىلاۋدا بولۋى ءتيىس»، – دەدى اكىم.
