“قازاۆتوجول” رەسپۋبليكالىق ماڭىزى بار اۆتوجولدارداعى قار مەن مۇزدى ۋاقىتىلى تازالاماعانى ءۇشىن جۇرگىزۋشىلەردىڭ ايىپتاۋىنا ۇشىرادى. وسىعان بايلانىستى كومپانيا اتقارعان جۇمىستارى جايلى ەگجەي-تەگجەيلى ەسەپ بەردى، دەپ حابارلايدى Dalanews.kz.

“تەك مەرەكە كۇندەرى رەسپۋبليكالىق ماڭىزى بار جولداردان 6،2 ميلليون تەكشە مەتردەن استام قار شىعارىلدى. 1-4 قاڭتار ارالىعىندا كۇن سايىن جولداردا 850 تەحنيكا بىرلىگى مەن 1 100 ادام جۇمىس ىستەدى.

مەرەكە كۇندەرى 18 مىڭ تەكشە مەتردەن استام كوكتايعاققا قارسى ماتەريال قولدانىلىپ، رەسپۋبليكالىق ماڭىزى بار اۆتوجولداردىڭ بارلىعىنان شامامەن 6،2 ميلليون تەكشە مەتر قار تازالاندى"، – دەپ حابارلادى “قازاۆتوجول” كومپانياسى پاتريوت telegram-ارناسىنا.

“قازاۆتوجول” ۇسىنعان مالىمتتەرگە سۇيەنسەك، كومپانيا قارقىندى جۇمىس ىستەپ جاتقانداي اسەر قالدىرادى.

“الايدا جۇرگىزۋشىلەر جولدارداعى كوكتايعاق پەن قار ۇيىندىلەرىنە ءالى دە شاعىم ءتۇسىرىپ جاتىر. ايتا كەتەيىك، بۇل – اقىلى جولدار”، — دەيدى پاتريوت telegram-ارناسى.

ەسكە سالايىق، بۇعان دەيىن "قازاۆتوجول" استانا ماڭىنداعى تاسجولدا 95 اۆتوكولىك سوقتىعىسقانى تۋرالى مالىمدەگەن ەدى.

3 قاڭتاردا ساعات 07:20-دا اۋا رايىنىڭ ناشارلاۋىنا بايلانىستى رەسپۋبليكالىق ماڭىزى بار "استانا-پەتروپاۆل" اۆتوجولىنىڭ (18-232 شاقىرىم) ۋچاسكەسىندە بارلىق اۆتوكولىك تۇرلەرىنىڭ قوزعالىسىنا شەكتەۋ ەنگىزىلدى. اۋا رايى جاقسارعاننان كەيىن جانە جول تازارتىلعان سوڭ، ساعات 12:30-دا ششۋچينسك قالاسى باعىتىنا قوزعالىس پوليسيا دەپارتامەنتى قىزمەتكەرلەرى مەن "قازاۆتوجول" ارنايى تەحنيكامەن ۇيىمداستىرىلدى.

الايدا الدىن الا مالىمەتتەر بويىنشا، جۇرگىزۋشىلەردىڭ جىلدامدىق رەجيمى مەن ءقاۋىپسىز قاشىقتىقتى ساقتاماۋىنان ساعات 13:28-دە جولدىڭ 153-شاقىرىمىندا، جاناتالاپ اۋىلى ماڭىندا شامامەن 95 كولىك جاپپاي جول اپاتىنا تۇسكەن.

وقيعا ورنىندا پوليسيا قىزمەتكەرلەرى مەن "قازاۆتوجول" ماماندارى جۇمىس ىستەدى. ءبىر جولاق تازارتىلىپ، جارامدى كولىكتەر قوزعالىسىن جالعاستىرعان ەدى. وقيعا ورنىندا 22 بىرىككەن جول ماشيناسى جانە 2 تراكتور جۇمىلدىرىلعان بولاتىن.