“QazAvtoJol” respýblikalyq mańyzy bar avtojoldardaǵy qar men muzdy ýaqytyly tazalamaǵany úshin júrgizýshilerdiń aiyptaýyna ushyrady. Osyǵan bailanysty kompaniia atqarǵan jumystary jaily egjei-tegjeili esep berdi, dep habarlaidy Dalanews.kz.
“Tek mereke kúnderi respýblikalyq mańyzy bar joldardan 6,2 million tekshe metrden astam qar shyǵaryldy. 1-4 qańtar aralyǵynda kún saiyn joldarda 850 tehnika birligi men 1 100 adam jumys istedi.
Mereke kúnderi 18 myń tekshe metrden astam kóktaiǵaqqa qarsy material qoldanylyp, respýblikalyq mańyzy bar avtojoldardyń barlyǵynan shamamen 6,2 million tekshe metr qar tazalandy", – dep habarlady “QazAvtoJol” kompaniiasy Patriot telegram-arnasyna.
“QazAvtoJol” usynǵan málimtterge súiensek, kompaniia qarqyndy jumys istep jatqandai áser qaldyrady.
“Alaida júrgizýshiler joldardaǵy kóktaiǵaq pen qar úiindilerine áli de shaǵym túsirip jatyr. Aita keteiik, bul – aqyly joldar”, — deidi Patriot telegram-arnasy.
Eske salaiyq, buǵan deiin "QazAvtoJol" Astana mańyndaǵy tasjolda 95 avtokólik soqtyǵysqany týraly málimdegen edi.
3 qańtarda saǵat 07:20-da aýa raiynyń nasharlaýyna bailanysty respýblikalyq mańyzy bar "Astana-Petropavl" avtojolynyń (18-232 shaqyrym) ýchaskesinde barlyq avtokólik túrleriniń qozǵalysyna shekteý engizildi. Aýa raiy jaqsarǵannan keiin jáne jol tazartylǵan soń, saǵat 12:30-da Shýchinsk qalasy baǵytyna qozǵalys politsiia departamenti qyzmetkerleri men "QazAvtoJol" arnaiy tehnikamen uiymdastyryldy.
Alaida aldyn ala málimetter boiynsha, júrgizýshilerdiń jyldamdyq rejimi men qaýipsiz qashyqtyqty saqtamaýynan saǵat 13:28-de joldyń 153-shaqyrymynda, Janatalap aýyly mańynda shamamen 95 kólik jappai jol apatyna túsken.
Oqiǵa ornynda politsiia qyzmetkerleri men "QazAvtoJol" mamandary jumys istedi. Bir jolaq tazartylyp, jaramdy kólikter qozǵalysyn jalǵastyrǵan edi. Oqiǵa ornynda 22 birikken jol mashinasy jáne 2 traktor jumyldyrylǵan bolatyn.
