شىعىس قازاقستان وبلىسىندا 2017-2020 جىلدار ارالىعىندا 136،6 ملرد. تەڭگەگە 95 اۋىلدا سۋ قۇبىرىنىڭ جاڭا قۇرىلىسى جوسپارلانۋدا. بۇل اۋىلدارداعى ورتالىقتاندىرىلعان سۋمەن جابدىقتاۋ دەڭگەيىن 61%-عا نەمەسە 13% وسىمگە، تۇرعىنداردى قامتۋ كورسەتكىشىن 84%-عا نەمەسە 35،5%-عا  قامتاماسىز ەتپەك. بۇل جونىندە تۇرعىندار الدىنداعى ەسەپتى كەزدەسۋ بارىسىندا وبلىس اكىمى دانيال احمەتوۆ ايتتى.

– تازا سۋمەن قامتۋ ءوڭىر ءۇشىن دەنساۋلىق ساقتاۋ، ءبىلىم بەرۋ سەكىلدى تۇرعىنداردىڭ ءومىر ساپاسىن قۇرايتىن باسىمدى الەۋمەتتىك جوبا. سوندىقتان دا، اۋىلداردى تازا اۋىز سۋمەن قامتاماسىز ەتۋ ءۇشىن وتكەن جىلى 14،1 ملرد. تەڭگەگە 51 جوبا قارجىلاندىرىلدى. جىلدىڭ قورىتىندىسىندا 8،3 ملرد. تەڭگەنىڭ 34 جوباسى اياقتالىپ، 21 اۋىلدا 17 مىڭ ادام ورتالىقتاندىرىلعان سۋمەن جابدىقتاۋعا قول جەتكىزدى، – دەدى دانيال احمەتوۆ.

اعىمداعى جىلى 13،7 ملرد. تەڭگەنىڭ 37 جوباسىن جۇزەگە اسىرۋ، 20 جوبانى قولدانىسقا بەرۋ جوسپارلانۋدا. 14 مىڭ ادام تۇراتىن 11 اۋىل سۋمەن قامتىلماق. قامتۋ 49%-دى قۇرايدى.