الماتى وبلىسىندا الەۋمەتتىك جاعداي ۋشىعىپ تۇر. حالىق نارىنقول مەن كەگەن اۋىلدارىن جالعايتىن شاعىن جولدىڭ تاعدىرىنا الاڭداۋلى، دەپ حابارلايدى Dalanews.kz.

پيسما پرەزيدەنتۋ تەلەگرام ارناسىنىڭ مالىمەتىنشە، “قازاۆتوجول” ۇلتتىق كومپانياسى بۇل باعىتتى جوندەۋگە 7،9 ملرد تەڭگەگە تەندەر جاريالاعان.

“جەڭىمپاز رەتىندە “نۇرلى جول-7” جاۋاپكەرشىلىگى شەكتەۋلى سەرىكتەستىگى انىقتالعان. الايدا ارادا ءبىراز ۋاقىت وتسە دە، جەرگىلىكتى تۇرعىندار جول بويىندا ەشقانداي جۇمىس باستالماعانىن ايتىپ دابىل قاعۋدا. ولار بيلىك وكىلدەرىنىڭ قۇرعاق ۋادەسىنەن شارشاعاندارىن جەتكىزدى”، — دەيدى دەرەككوز.

ايتا كەتەيىك، بۇعان دەيىن الماتى قالاسىنىڭ اكىمدىگى وجەت شاعىناۋدانى تۇرعىندارىنىڭ تىلەندييەۆ كوشەسىنىڭ جوباسىن قايتا قاراۋ تۋرالى تالابىنا جاۋاپ بەرگەن ەدى.

"تىلەندييەۆ كوشەسىنىڭ باعىتىن وزگەرتۋ مۇمكىن ەمەس، ويتكەنى ونىڭ باتىس جاعىندا جول سالۋعا بولمايتىن ۇلكەن ساي ورنالاسقان. جولدىڭ قىزىل سىزىقتارىن شىعىسقا جىلجىتۋ جەر تەلىمدەرىنىڭ بۇرىنعىدان دا كوپ مولشەردە ساتىپ الىنۋىنا اكەپ سوعادى"، – دەپ مالىمدەدى اكىمدىك.

شەنەۋنىكتەردىڭ ايتۋىنشا، "مەملەكەت قاجەتتىلىگى ءۇشىن جەر تەلىمدەرى ولاردىڭ قۇقىقتىق نەگىزىنە قاراماستان، نارىقتاعى باعامەن ساتىپ الىنادى".

باس جوسپار مەن ەگجەي-تەگجەيلى جوسپارلاۋ جوبالارىنا سايكەس، تىلەندييەۆ كوشەسىن رىسقۇلوۆ داڭعىلىنان باستاپ قالانىڭ شەكاراسىنا دەيىن ۇزارتۋ جوسپارلانعان، جالپى ۇزىندىعى – 10،8 شاقىرىم.

جوبا ەكى كەزەڭگە بولىنەدى:

• 1-كەزەڭ – رىسقۇلوۆ داڭعىلىنان دارحان شاعىناۋدانىنداعى ساباتايەۆ كوشەسىنە دەيىن، 5،8 شاقىرىم. بۇل كەزەڭدە 165 جەر تەلىمى ساتىپ الىنادى.

• 2-كەزەڭ – ساباتايەۆ كوشەسىنەن قالا شەكاراسىنا دەيىن، 4،9 شاقىرىم. مۇندا 392 جەر تەلىمى ساتىپ الىنۋعا ءتيىس.

جۋىردا الاتاۋ اۋدانىنىڭ تۇرعىندارى الماتىنىڭ جاڭا اكىمى دارحان ساتىبالدىعا رەسمي تۇردە ۇندەۋ جولدادى. ولار تىلەندييەۆ كوشەسى سالىنۋى سالدارىنان جالعىز باسپانالارىنان ايىرىلىپ قالۋى مۇمكىن ەكەنىن ايتتى.

تۇرعىنداردىڭ سوزىنشە، بۇل شەشىم اقىلعا قونىمسىز، ويتكەنى جولدى باسقا باعىتپەن دە جۇرگىزۋگە بولادى جانە جەر تەلىمدەرىن، ۇيلەردى ساتىپ الۋعا ميللياردتاعان تەڭگە جۇمساماۋعا بولادى.

"ءبىز مەملەكەت بيۋدجەتىنەن ميللياردتاعان تەڭگەنى ۇنەمدەۋدى ۇسىنىپ وتىرمىز. ...ءبىز توقتامايمىز، سوڭىنا دەيىن ءۇيىمىز ءۇشىن كۇرەسەمىز. ويتكەنى كوپ قارجى جۇمسالمايتىن جەردە ميللياردتاعان تەڭگەنى بوسقا شاشۋ – بۇكىل مەملەكەت مۇددەسىنە قارسى شەشىم"، – دەلىنگەن تۇرعىندار جولداعان ۇندەۋدە.