ساۋاپتى ىستەرىمەن تۇركىستاندىقتاردىڭ العىسىنا بولەنىپ جۇرگەن «ۇلەس» قوعامدىق قايىرىمدىلىق قورىنىڭ ءتوراعاسى رايىمجان قوشقاروۆتىڭ باستاماسىمەن ەل تاۋەلسىزدىگىنىڭ 30 جىلدىعىنا وراي «مۇقتاج وتباسىلارعا 30 ءۇي» ۇرانىمەن قايىرىمدىلىق اكسياسى باستالعان بولاتىن.

بۇگىن 69 جاستاعى قالا تۇرعىنى بيباجار سالايەۆا ءۇش نەمەرەسىمەن بەس بولمەلى جاڭا شاڭىراققا كىرىپ، قۋانىشقا بولەندى. بۇل «ۇلەس» قوعامدىق قايىرىمدىلىق قورىنىڭ ۇلەستىرىپ جاتقان وتىزىنشى ءۇيى.

قونىس تويعا قاتىسقان وبلىستىق اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ، تۇركىستان قالاسى «بىرلىك» تۇرعىن ءۇي الابى بويىنشا اتالمىش ۇيىمنىڭ باسشىسى تايىر ابدۋالييەۆ ءبيبىاجار اپاعا ىزگى نيەتتەرىن ءبىلدىرىپ، جاڭا ءۇيدىڭ كىلتىن سالتاناتتى تۇردە تاپسىردى.

ءبىر جارىم ايدىڭ ىشىندە قۇرىلىسى اياقتالعان جاڭا ءۇي تابيعي گاز، ءۇي جيھازدارى، كورپە-توسەك، ىدىس-اياق، بارشا كەرەك-جاراقپەن جابدىقتالعان.

شاراعا قاتىسقان «ۇلەس» قوعامدىق قايىرىمدىلىق قورى مۇشەلەرى قىسقا ۋاقىت ىشىندە سالىنعان ۇيگە كومەك قولىن سوزعان جەرگىلىكتى كاسىپكەرلەرگە العىسىن جەتكىزدى. ءوز كەزەگىندە ج.ازىرەتبەرگەنوۆ اتالمىش قوردىڭ ءتوراعاسى ر.قوشقاروۆقا تۇركىستاندىقتار اتىنان العىس ايتىپ، ەل يگىلىگى جولىنداعى اتقارىپ جاتقان جۇمىستارىنا ساتتىلىك تىلەدى.