قالالىق سوت مالىمەتىنە سايكەس، سوتتالۋشىلار شەتەلدىك ازاماتتارمەن ءسوز بايلاسىپ (ولارعا قاتىستى قىلمىستىق ءىس بولەك وندىرىسكە بولىنگەن) بولاشاق ينۆەستورلارعا اقشا وپەراسيالارىن باقىلاي الاتىنداي ينتەرنەت-پلاتفورماسىن قۇرعان. كليەنتتەر الەۋمەتتىك جەلىلەردە جارنامالاۋ، كىتاپشالاردى تاراتۋ، ونلاين ترەنينگتەر وتكىزۋ، ينۆەستيسيالىق كومپانيا رەتىندە جوباسىن پوزيسيالاۋ جانە ءاربىر ينۆەستورعا سالىنعان سومانىڭ 5-تەن 15%-كە دەيىن اي سايىن الاتىنىنا ۋادە بەرۋ ارقىلى تارتىلعان.

— الاياقتىق بارىسىندا 13 ادامعا جالپى سوماسى 59 894 237 تەڭگە ماتەريالدىق شىعىن كەلتىرىلگەن. سوتتالۋشىلار كىنالارىن مويىندامادى. سوت ۇكىمىمەن ا.، ك.، س. قارجى پيراميداسىن قۇرۋ جانە باسقارۋ بويىنشا كىنالى دەپ تانىلىپ، جابىرلەنۋشىلەردىڭ ازاماتتىق تالاپتارىن قاناعاتتاندىرا وتىرىپ، 5 جىل باس بوستاندىعىنان ايىرۋ جازاسى تاعايىندالدى، - دەپ حابارلايدى الماتى قالاسىنىڭ سوتىنان.