"كوروناۆيرۋسپەن ءدال ءقازىر كۇرەسۋ ءۇشىن رەسپۋبليكالىق بيۋدجەتتەن 191،9 ملرد تەڭگە ءبولىندى. ونىڭ ىشىندە بيۋدجەتتى انىقتاۋ اياسىندا 125 ملرد تەڭگە جانە ۇكىمەت رەزەرۆىنەن 66،9 ملرد تەڭگە بولدىك"، – دەدى شولپانقۇلوۆ.
ايتۋىنشا الگى اقشا ناقتى ماقساتقا جۇمسالادى. مەمتاپسىرىس مۇقيات باقىلانىپ، اۋدارىلعان اقشا كوزدەگەن جەرگە جەتكەنگە دەيىن قاداعالاۋدا بولادى.
"البەتتە دەنساۋلىق ساقتاۋ مينيسترلىگى دە بۇل ىسكە اتسالىسادى. بۇلار مەديسيناعا باعىتتالعان قارجىنىڭ قالاي يگەرىلگەنىن مەدقىزمەتتى باقىلاۋ كوميتەتى ارقىلى مونيتورينگ جاسايدى"، – دەيدى قارجى ءمينيسترىنىڭ مىندەتىن اتقارۋشى.
بولىنگەن اقشانىڭ 125 ملرد-ى ىندەتكە قارسى ءىس-شارالارعا بولىنبەك. ونىڭ ىشىندە دارىگەر ايلىعىنا ۇستەمە قوسۋ، ينفەكسيالىق اۋرۋحانا سالۋ جانە تاعى باسقاسى كىرەدى.
ۇكىمەت رەزەرۆىنەن كوروناۆيرۋسپەن كۇرەس ماقساتىندا بولىنگەن 66 ملرد 957 ملن تەڭگەنىڭ 46 ملرد-ى دەنساۋلىق ساقتاۋ مينيسترلىگىنە اۋدارىلادى.
"بۇدان بولەك حالىقتى قولداۋعا، ەكونوميكانى كوتەرۋگە تاعى 575 ملرد تەڭگە بولدىك. بۇل اقشانىڭ ءبىرشاما بولىگى توقايەۆتىڭ تاپسىرماسى بويىنشا نۇر-سۇلتان مەن وزگە قالاداعى پروبلەمالىق قۇرىلىس نىساندارىن اياقتاۋعا، سول ارقىلى ۇلەسكەرلەر ماسەلەسىن شەشۋگە جۇمسالماق"، – دەيدى شولپانقۇلوۆ.
بۇدان بۇرىن پرەزيدەنت توقايەۆ كوروناۆيرۋسپەن كۇرەسكە 6 ترلن تەڭگە اقشا كەتكەنىن ايتقان.
"جالپى، ءبىز قابىلداعان شارالارعا مەملەكەت بەس جارىم، ءتىپتى شامامەن 6 تريلليون تەڭگە شىعىندادى – بۇل 13 ميلليارد دوللار نەمەسە جالپى ىشكى ءونىمنىڭ 8 پايىزدان استام كولەمى. ياعني، تاعى قايتالاپ ايتامىن، بۇل بۇرىن-سوڭدى بولماعان، شۇعىل ارەكەت ەتۋدى قاجەت ەتكەن شارالار.
بۇل شارالاردى ماقساتتى تۇردە قولعا الدىق، ارينە، ەرتەڭ سىن-ەسكەرتپەلەر بولۋى مۇمكىن، ماسەلەن اقشانى جەلگە شاشتى دەگەندەي. ءبىراق مەن، ەڭ الدىمەن، بۇل جاعدايدا ءبىزدىڭ ازاماتتارىمىزدىڭ ءومىرى مەن ءال-اۋقاتى ءۇشىن ايانباي كۇرەسۋىمىز كەرەك دەپ سانايمىن، – دەگەن ەدى مەملەكەت باسشىسى.
