"Koronavirýspen dál qazir kúresý úshin respýblikalyq biýdjetten 191,9 mlrd teńge bólindi. Onyń ishinde biýdjetti anyqtaý aiasynda 125 mlrd teńge jáne Úkimet rezervinen 66,9 mlrd teńge bóldik", – dedi Sholpanqulov.
Aitýynsha álgi aqsha naqty maqsatqa jumsalady. Memtapsyrys muqiiat baqylanyp, aýdarylǵan aqsha kózdegen jerge jetkenge deiin qadaǵalaýda bolady.
"Álbette Densaýlyq saqtaý ministrligi de bul iske atsalysady. Bular meditsinaǵa baǵyttalǵan qarjynyń qalai igerilgenin medqyzmetti baqylaý komiteti arqyly monitoring jasaidy", – deidi Qarjy ministriniń mindetin atqarýshy.
Bólingen aqshanyń 125 mlrd-y indetke qarsy is-sharalarǵa bólinbek. Onyń ishinde dáriger ailyǵyna ústeme qosý, infektsiialyq aýrýhana salý jáne taǵy basqasy kiredi.
Úkimet rezervinen koronavirýspen kúres maqsatynda bólingen 66 mlrd 957 mln teńgeniń 46 mlrd-y Densaýlyq saqtaý ministrligine aýdarylady.
"Budan bólek halyqty qoldaýǵa, ekonomikany kóterýge taǵy 575 mlrd teńge bóldik. Bul aqshanyń birshama bóligi Toqaevtyń tapsyrmasy boiynsha Nur-Sultan men ózge qaladaǵy problemalyq qurylys nysandaryn aiaqtaýǵa, sol arqyly úleskerler máselesin sheshýge jumsalmaq", – deidi Sholpanqulov.
Budan buryn prezident Toqaev koronavirýspen kúreske 6 trln teńge aqsha ketkenin aitqan.
"Jalpy, biz qabyldaǵan sharalarǵa memleket bes jarym, tipti shamamen 6 trillion teńge shyǵyndady – bul 13 milliard dollar nemese jalpy ishki ónimniń 8 paiyzdan astam kólemi. Iaǵni, taǵy qaitalap aitamyn, bul buryn-sońdy bolmaǵan, shuǵyl áreket etýdi qajet etken sharalar.
Bul sharalardy maqsatty túrde qolǵa aldyq, árine, erteń syn-eskertpeler bolýy múmkin, máselen aqshany jelge shashty degendei. Biraq men, eń aldymen, bul jaǵdaida bizdiń azamattarymyzdyń ómiri men ál-aýqaty úshin aianbai kúresýimiz kerek dep sanaimyn, – degen edi Memleket basshysy.
