ءيا، ول ۋادەنى ۇيىپ-توگىپ جاتىر. ءبىز تىڭداپ وتىرمىز. تاڭعالىپ وتىرعانىمىزدى دا جاسىرمايمىز. مينيستر بولعانى كۇنى كەشە عانا، ءبىراق تاۋ قوپاراتىن ءتۇرى بار.
رەفورمالار، رەفورمالار جانە تاعى دا رەفورمالار. ءبىر جەردەن كورگەن، ءبىر جەردەن ەستىگەن سياقتىمىز. ءيا، ەستىگەنبىز. ساعادييەۆ تە وسى مينيسترلىكتە وزىنەن بۇرىنعى ادامعا قاتتى ۇقسايدى. ول دا سويتكەن…
سونىمەن، ساعادييەۆ قانداي ۋادە بەردى؟ جىلىكتەپ جەتكىزەيىكشى.
ءبىرىنشىسى. الداعى ءۇش جىلدا قازاقستانداعى ورىسشا وقيتىن 500 مىڭ وقۋشى قازاقشا سويلەيتىن بولادى.
ەكىنشىسى. 2019 جىلعا قاراي، بالاباقشا كەزەگى جويىلادى.
ءۇشىنشىسى. 2020 جىلى وقۋشىلاردىڭ 90 پايىزى، ستۋدەنتتەردىڭ 100 پايىزى ينتەرنەتپەن قامتاماسىز ەتىلەدى.
جانە ءتورتىنشىسى. 2021 جىلى مەملەكەتتىك ۇلگىدەگى ديپلومداردى بەرۋدەن باس تارتامىز.
مىنە، ساعادييەۆ وسىلاي دەيدى.
ءبىز مۇنى ءمينيستردىڭ ۋادە بەرگەنى دەپ تۇسىندىك. مينيستر دەڭگەيىندەگى ادامنىڭ ايتقان ءسوزى جەلگە ۇشپايتىن شىعار…
ايتتى ما، ورىندايدى. ورىنداۋى كەرەك. ۋادەنىڭ ميسسياسى سونداي ءوزى.
ساعادييەۆتىڭ ۋادەلەرىنىڭ ىشىندە بىزگە «ورىسشا وقيتىن 500 مىڭ بالانى قازاقشا سويلەتكەلى وتىرعان» باستاماسى ۇنادى. دۇرىس قوي ەندى.
تاۋەلسىز ەلدە ومىرگە كەلگەن ۇرپاقتىڭ قازاقشا سويلەيتىن ءجونى بار عوي.
الايدا ايتۋعا وڭاي. ساعادييەۆتىڭ الداعى ءۇش جىل دەگەنى – 2019 جىل. كورىڭىز دە تۇرىڭىز، وتە شىعادى. ءۇش جىلدىڭ ىشىندە ورىسشا ويلايتىن، ورىسشا ءتۇس كورەتىن 500 مىڭ وقۋشىنى قازاقشا سويلەتپەك، ساعادييەۆ. ءبىراق، قالاي؟
25 جىل بويى قازاقشا سويلەمەگەن، ۇرپاعىن دا سويلەتپەگەن الگى 500 مىڭ وقۋشىنىڭ اتا-اناسى ساعادييەۆتىڭ سوزىنەن كەيىن وزگەرىپ شىعا كەلەدى دەگەنگە كىم سەنەدى؟
سوندا، ساعادييەۆتىڭ ءوزى سول مەرزىمگە دەيىن وسى ورىنتاعىن ساقتاپ قالارىنا سەنىمدى مە؟.. بىزدە سولاي عوي، بىلەسىز.
سوسىن، ونىڭ ورنىنا كەلگەن وزگە بىرەۋ ساعادييەۆتىڭ باستاپ بەرگەنىن جالعاستىرۋعا قۇلىقتى بولار ما ەكەن؟ ايتالىق، ساعادييەۆتىڭ ءوزى ءسارىنجىپوۆ باستاپ كەتكەن قاي رەفورمانى اياعىنا دەيىن جەتكىزدى؟
وتكەنگە ۇڭىلسەك، وسى مينيسترلىكتىڭ كرەسلوسىنا وتىراتىنداردىڭ بىردە-بىرى وزىنەن بۇرىنعىلاردىڭ باستاپ بەرگەنىن جالعاستىرماعان. بارلىعى رەفورمامەن كەلگەن. بارلىعى تاۋ قوپاراتىن سياقتى كورىنگەن.
سولاي.
قازاق «ارىق سويلەپ، سەمىز شىق» دەيدى. كورەيىك. كۇتەيىك.
