قاراعاندى وبلىسى ءماسليحاتىنىڭ دەپۋتاتى، ايتىسكەر اقىن ايتباي جۇماعۇل LiFe 09 YouTube ارناسىنا بەرگەن سۇحباتىندا بيلىكتەگى ارىپتەستەرىن سىنعا الدى، دەپ حابارلايدى Dalanews.kz.

ول قاراعاندىدا يۆان كوستەنكو اتىنداعى شاحتادا 46 ادام قازا تاپقاندا بىردە-بىر دەپۋتاتتىڭ توبە كورسەتپەگەنىنە قاپالاندى.

“كەشە ايتىسقا باردىم. "امانات" پارتياسى ۇيىمداستىرعان "التىن دومبىراعا" بارلىق دەپۋتات باردى. سول كەزدە ولارعا "46 شاحتەر ءولدى، نەگە كەلمەدىڭدەر؟" دەدىم. سويتسەم: "بىزدە ءبارى حاتتامامەن عوي، بىزدەن ەكى دەپۋتات باردى، ءبىزدى جىبەرمەيدى" دەپ سىلتاۋ ايتادى. بۇل بارلىق دەپۋتاتقا قاتىستى سىن: ايتىسكەرىنە دە، زاڭگەرىنە دە، باسقاسىنا دا. بىرەۋى كەلگەن جوق. كەلسە حالىق وزدەرى سايلاعاندار كەلدى، ەگەر ولار كەلمەگەندە، بۇدان بىلاي قاراعاندىعا اتتاپ باسۋعا قاقى بولماۋشى ەدى. ءبىر ەمەس، 46 ادام قايتىس بولعاندا ءبىر دەپۋتاتتىڭ كەلمەۋى سۇمدىق قوي”، - دەدى اقىن.

ونىڭ ايتۋىنشا، جەرلەۋ راسىمىنە دە ەشكىم كەلمەگەن. بۇل وقيعانى ەسكە تۇسىرە وتىرىپ، دەپۋتات كوز جاسىنا ەرىك بەردى.

“قىزىلوردا، ماڭعىستاۋ بولسا، ءتۇسىنۋشى ەدىم. ال قاراعاندى ءتيىپ تۇر. ون كۇن جەرلەدىك. ءبىزدىڭ اۋىلدان ەكى ادام قايتىس بولدى. قايتىس بولعان ادامنىڭ بالاسىمەن جانازادا قاتار تۇردىق، وڭاي ەمەس... قاراعاندىدان ءبىر اقىن كەلگەن جوق. وسىدان سوڭ مەن اقىنمىن، دەپۋتاتپەن قالاي ايتادى؟ مەن دە كەرەمەتپىن دەمەيمىن، ءبىراق شامام كەلگەنشە بىرنەشە ادامنىڭ جانازاسىنا باردىق، قايعىدان قان جۇتقان وتباسىلارعا كوڭىل ايتتىق”، - دەدى ول.

وسىلايشا ءماسليحات دەپۋتاتى اۋىزبەن وراق وراتىنداردى دا سىنعا الىپ، ءبارىن ىسپەن كورسەتۋ كەرەكتىگىن ايتادى.