اقتٶبە وبلىسىنىڭ ديقاندارى كيٸكتٸڭ قاپتاۋىنان جٷزدەگەن ميلليون تەڭگە شىعىنعا ۇشىراعانىن ايتىپ دابىل قاقتى. ولار ەكولوگييا مينيسترلٸگٸنەن جانۋارلاردىڭ سانىن رەتتەۋ ٷشٸن اتۋعا رۇقسات بەرۋدٸ تالاپ ەتۋدە, دەپ حابارلايدى Dalanews.kz.
"قۇمقۇدىق" جشس ديرەكتورى الەكساندر چەمودانوۆتىڭ ايتۋىنشا, ەيتەكەبي اۋدانىنداعى شارۋاشىلىعى بيداي مەن كٷنباعىستىڭ تۇقىمىنان ايىرىلىپ, جالپى شىعىن كٶلەمٸ 400 ملن تەڭگەدەن اسقان. ونىڭ سٶزٸنشە, جاز بويى شارۋالار ەگٸندٸ قورعاپ, جانۋارلاردى قۋۋعا تىرىسقانىمەن, شىعىندى توقتاتۋ مٷمكٸن بولماعان.
اۋىل ازاماتتارى جاعدايدىڭ ۋشىعۋى ٶڭٸردەگٸ اۋىل شارۋاشىلىعىنىڭ بولاشاعىنا قاۋٸپ تٶندٸرٸپ وتىرعانىن ايتادى. ەسٸرەسە 500-3000 گەكتار جەرٸ بار ۇساق شارۋاشىلىقتار ٷشٸن شىعىن ٶتە اۋىر. ولار تەك ەگٸننەن ەمەس, مال ازىعىنا ارنالعان شٶپ قورىنان دا ايىرىلعان. مۇنداي جاعداي شاعىن فەرمەرلەر ٷشٸن بانكروتقا پارا-پار.
وبلىستىق اۋىل شارۋاشىلىعى باسقارماسى ايتەكەبي اۋدانىندا شامامەن 12 مىڭ گەكتار ەگٸستٸكتٸ كيٸكتەر تاپتاپ كەتكەنٸن راستادى. باسقارما ٶكٸلٸ نۇربەك رايىمباەۆتىڭ ايتۋىنشا, جانۋارلاردى قۋۋ ٷشٸن ارنايى توپتار جٸبەرٸلگەن, الايدا شىعىندى ٶتەۋ زاڭدا قاراستىرىلماعان.
جانۋارلار دٷنيەسٸن قورعاۋ ينسپەكتسيياسى دا ٶز ۇستانىمىن بٸلدٸرٸپ, ٶڭٸردە كيٸكتەردٸڭ سانى ازايىپ كەتكەندٸكتەن اتۋعا رۇقسات بەرٸلمەيتٸنٸن تٷسٸندٸردٸ. سونداي-اق ەت كومبيناتىنىڭ شالعايلىعىنا بايلانىستى كيٸك ەتٸن ٶڭدەۋ دە قيىندىق تۋدىرىپ وتىرعانىن ايتتى.
دەگەنمەن فەرمەرلەر جانۋارلاردىڭ سانىن رەتتەۋدٸ قاجەت دەپ سانايدى. ولار مەملەكەت تيٸستٸ رۇقسات بەرسە, ٶز قاراجاتىنا ەت ٶڭدەيتٸن زاۋىت سالۋعا دايىن ەكەندەرٸن جەتكٸزدٸ.
