Aqtóbe oblysynyń diqandary kiiktiń qaptaýynan júzdegen million teńge shyǵynǵa ushyraǵanyn aityp dabyl qaqty. Olar Ekologiia ministrliginen janýarlardyń sanyn retteý úshin atýǵa ruqsat berýdi talap etýde, dep habarlaidy Dalanews.kz.
"Qumqudyq" JShS direktory Aleksandr Chemodanovtyń aitýynsha, Áitekebi aýdanyndaǵy sharýashylyǵy bidai men kúnbaǵystyń tuqymynan aiyrylyp, jalpy shyǵyn kólemi 400 mln teńgeden asqan. Onyń sózinshe, jaz boiy sharýalar egindi qorǵap, janýarlardy qýýǵa tyrysqanymen, shyǵyndy toqtatý múmkin bolmaǵan.
Aýyl azamattary jaǵdaidyń ýshyǵýy óńirdegi aýyl sharýashylyǵynyń bolashaǵyna qaýip tóndirip otyrǵanyn aitady. Ásirese 500-3000 gektar jeri bar usaq sharýashylyqtar úshin shyǵyn óte aýyr. Olar tek eginnen emes, mal azyǵyna arnalǵan shóp qorynan da aiyrylǵan. Mundai jaǵdai shaǵyn fermerler úshin bankrotqa para-par.
Oblystyq aýyl sharýashylyǵy basqarmasy Aitekebi aýdanynda shamamen 12 myń gektar egistikti kiikter taptap ketkenin rastady. Basqarma ókili Nurbek Raiymbaevtyń aitýynsha, janýarlardy qýý úshin arnaiy toptar jiberilgen, alaida shyǵyndy óteý zańda qarastyrylmaǵan.
Janýarlar dúniesin qorǵaý inspektsiiasy da óz ustanymyn bildirip, óńirde kiikterdiń sany azaiyp ketkendikten atýǵa ruqsat berilmeitinin túsindirdi. Sondai-aq et kombinatynyń shalǵailyǵyna bailanysty kiik etin óńdeý de qiyndyq týdyryp otyrǵanyn aitty.
Degenmen fermerler janýarlardyń sanyn retteýdi qajet dep sanaidy. Olar memleket tiisti ruqsat berse, óz qarajatyna et óńdeitin zaýyt salýǵa daiyn ekenderin jetkizdi.
