تاعى 12 مىڭنان استام قازاقستاندىق "ناۋرىز" تۇرعىن ءۇي باعدارلاماسىنىڭ قاتىسۋشىسى اتاندى. ءوتىنىش بەرۋشىلەر مەن جاڭا تۇرعىن ءۇي باعدارلاماسىنا قاتىسۋشىلاردىڭ تولىق ءتىزىمى وتباسى بانكىنىڭ رەسمي سايتىندا جاريالاندى، دەپ حابارلايدى Dalanews.kz.
بارلىعى 34 745 ءوتىنىم وڭدەلدى. ونىڭ ءاربىر ءۇشىنشىسى قاتىسۋشىلار تىزىمىنە ەندى.
"ناۋرىز" باعدارلاماسىنا قاتىسۋشىلار 2025 جىلدىڭ 10 ساۋىرىنەن 16 مامىرعا دەيىنگى ۋاقىت ارالىعىندا وتباسى بانكىنە كرەديتتىك ءوتىنىم بەرۋى ءتيىس. ەگەر باعدارلاماعا قاتىسۋشى زاەم بويىنشا وڭ ماقۇلداۋ السا، وندا ونىڭ باسپانا تاۋىپ، ونى ساتىپ الۋعا 6 اي ۋاقىتى بولادى. قاتىسۋشىلاردى ىرىكتەۋ بالدىق جۇيە بويىنشا اۆتوماتتى تۇردە جۇرگىزىلدى»، دەپ ناقتىلايدى بانكتەگىلەر.
ۇپايلار قالاي ەسەپتەلەدى؟
- سالىم بويىنشا سىياقى مولشەرى - ءاربىر 1 000 تەڭگە ءۇشىن 1 ۇپاي؛
- تىركەلگەن نەكەنىڭ بولۋى - 5 ۇپاي؛
- بالالاردىڭ بولۋى - 10 ۇپاي (بالالار سانىنا قاراماستان)؛
- حالىقتىڭ الەۋمەتتىك وسال توپتارى (ءحاوت) مارتەبەسىنىڭ بولۋى - 10 ۇپاي؛
- 35 جاسقا دەيىنگى جاس (قوسا العاندا) – 5 ۇپاي.
"ناۋرىز" باعدارلامالارىنىڭ شارتتارى:
- العاشقى جارنا: تازا ارلەۋدەگى تۇرعىن ءۇي ساتىپ الۋ كەزىندە 10%-دان جانە ارلەنبەگەن نەمەسە قايتالاما نارىقتاعى تۇرعىن ءۇي ساتىپ الۋ كەزىندە 20%-دان باستاپ؛
- تۇرعىن ءۇي كەزەگىندە تۇرعان ازاماتتاردىڭ الەۋمەتتىك وسال ساناتتارى ءۇشىن كرەديت بويىنشا مولشەرلەمە - 7% (جتسم 7،1%-دان 9،6% دەيىن)؛
- ازاماتتاردىڭ بارلىق ساناتتارى ءۇشىن كرەديت بويىنشا مولشەرلەمە - 9% (جتسم 9،4%-دان 13% دەيىن)؛
- نەسيە مەرزىمى - 19 جىلعا دەيىن.
"ناۋرىز" باعدارلاماسى اياسىندا تۇرعىن ءۇي ساتىپ الۋ بويىنشا كەلەسى شارتتار ۇسىنىلادى:
- العاشقى نارىقتاعى ونىڭ ىشىندە قتك كەپىلدىگىمەن ۇلەستىك قاتىسۋ شارتى بار تۇرعىن ءۇي؛
- مونوقالالار مەن اۋىلدىق ەلدىمەكەندەردەگى قايتالاما نارىقتاعى تۇرعىن ءۇي، ءبىر جىلعا بولىنگەن قاراجاتتىڭ جالپى كولەمىنىڭ 30%-نان اسپاۋى شارت.
زاەمنىڭ ەڭ جوعارعى مولشەرى:
- استانا مەن الماتى قالالارى ءۇشىن - 36 ملن تەڭگەگە دەيىن.
- قالعان وڭىرلەر ءۇشىن – 30 ملن تەڭگەگە دەيىن.
سونداي-اق، ءبىر نەسيە شارتى اياسىندا ساتىپ الىنعان باستاپقى تۇرعىن ءۇيدى جوندەۋگە اقشا الۋعا دا بولادى. جوندەۋگە ارنالعان قارىز سوماسى تۇرعىن ءۇي ساتىپ الۋعا ارنالعان كرەديتتىڭ جالپى سوماسىنىڭ 20%-نان اسپاۋعا ءتيىس.
"باعدارلاماعا قاتىسۋشى باسپانا ماركەت پورتالىنان (otbasybank.kz) باستاپقى تۇرعىن ءۇيدى تاڭداپ، برونداپ، ساتىپ الا الادى. بۇل وپسيا باعدارلامانىڭ جۇزەگە اسۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەۋگە ارنالعان"، دەپ ناقتىلايدى بانكتەگىلەر.
اتالمىش پلاتفورماعا ورنالاستىرىلماستان بۇرىن ءاربىر نىسان تۇرعىن ءۇيدىڭ اعىمداعى نارىقتىق باعاسى نەگىزىندە قۇنىن كەلىسۋ پروسەسىنەن وتەدى. ەگەر ول نارىققا سايكەس كەلسە، وندا وسى نىساننىڭ قۇرىلىس سالۋشىسىمەن 1 شارشى مەترگە باعانى بەلگىلەي وتىرىپ، تۇرعىن ءۇيدى ساتۋ تۋرالى كەلىسىم جاسالادى.
ايتا كەتسەك، 2024 جىلى "وتاۋ" جانە "ناۋرىز" باعدارلامالارى بويىنشا 10 249 قازاقستاندىق وتباسى قونىس تويىن تويلاعان.
بۇعان دەيىن وتباسى بانكى ونەركاسىپ، ەنەرگەتيكا، كولىك، اۋىل شارۋاشىلىعى جانە سۋ رەسۋرستارى سالالارىنىڭ قىزمەتكەرلەرى ءۇشىن "ناۋرىز جۇمىسكەر" جاڭا تۇرعىن ءۇي باعدارلاماسىن ىسكە قوسقانىن حابارلاعان بولاتىن. "ناۋرىز جۇمىسكەر" "ناۋرىز" تۇرعىن ءۇي باعدارلاماسىنىڭ ءبىر بولىگى بولىپ تابىلادى. 2024 جىلدىڭ قورىتىندىسى بويىنشا باسپانا الامىن دەپ اقشا جيناپ جۇرگەن 2 134 279 قازاقستاندىق مەملەكەتتىك سىياقى الا الادى. وندا دا وتباسى بانكتىڭ ءاربىر ءتورتىنشى سالىمشىسى 147 680 تەڭگە كولەمىندەگى ەڭ جوعارى سىياقىعا ءىلىندى. 200 اەك-تەن اسپايتىن جيناق سوماسىنا 20% مولشەرىندە مەملەكەت سىياقى ەسەپتەلەدى. 2024 جىلى 1 اەك 3 692 تەڭگە بولدى. بۇل ىنتالاندىرۋعا جاتاتىن ماكسيمالدى سوما 738 400 تەڭگەنى قۇرايدى دەگەندى بىلدىرەدى.
