الاكولدىڭ اباي وبلىسىنداعى جاعالاۋىندا پوليسيا كۇشەيتىلگەن جۇمىس رەجيمىنە كوشتى،- دەپ حابارلايدى Dalanews.kz
جازعى تۋريستىك ماۋسىمنىڭ باستالۋىنا بايلانىستى الاكول جاعالاۋىندا پوليسيا قىزمەتكەرلەرى قوعامدىق ءتارتىپتى ساقتاۋ، سانيتارلىق قاۋىپسىزدىكتى قامتاماسىز ەتۋ جانە وڭىرگە كەلگەن دەمالۋشىلارعا جايلى جاعداي جاساۋ ءۇشىن كۇشەيتىلگەن رەجيمدە قىزمەت اتقارۋدا.
سانيتاريالىق-ەپيدەميولوگيالىق قىزمەتپەن بىرلەسىپ تۇراقتى تۇردە رەيدتىك ءىس-شارالار وتكىزىلىپ جاتىر. بۇل رەتتە سانيتارلىق نورمالاردى بۇزۋ، رۇقساتسىز ساۋدامەن اينالىسۋ، سونداي-اق جاعالاۋ اۋماعىنداعى تازالىق پەن تىنىشتىقتى بۇزاتىن قۇقىققا قارسى ارەكەتتەردى انىقتاۋعا ەرەكشە نازار اۋدارىلۋدا.
"ماۋسىم باستالعالى بەرى پوليسيا قىزمەتكەرلەرى 300-گە جۋىق اكىمشىلىك قۇقىق بۇزۋشىلىقتى انىقتادى. ونىڭ ىشىندە ەڭ كوپ تىركەلگەنى — ورتاق پايدالانۋداعى ورىنداردى لاستاۋ بويىنشا 141 جاعداي. سونىمەن قاتار، مال جايۋعا تىيىم سالىنعان اۋماقتاردا — 74 جاعداي، اباتتاندىرۋ قاعيدالارىن بۇزۋ — 15، رۇقسات ەتىلمەگەن ساۋدا — 22 فاكتى انىقتالدى. سونداي-اق، كولىك قۇرالىن ماس كۇيدە باسقارۋدىڭ 13 جاعدايى، قۇجاتسىز باسقارۋدىڭ 7 دەرەگى جانە جاياۋ جۇرگىنشىلەر تاراپىنان 8 قۇقىق بۇزۋشىلىق تىركەلدى"، - دەلىنگەن حابارلامادا.
ءتارتىپ ساقشىلارى تاراپىنان پروفيلاكتيكالىق جۇمىس تۇراقتى تۇردە جۇرگىزىلۋدە.
اباي وبلىسى پوليسيا دەپارتامەنتى دەمالۋشىلاردى الاكولدىڭ بىرەگەي تابيعاتىن ساقتاپ، بارشاعا ءقاۋىپسىز ءارى جايلى دەمالىس ماۋسىمىن قامتاماسىز ەتۋ ءۇشىن قوعامدىق ءتارتىپ پەن تازالىقتى ساقتاۋعا شاقىرادى.
