وتكەن سارسەنبىدە مەن دەپۋتاتتىق ساۋال جاساعاندا قازاق ءتىلى مەملەكەتتىك ءتىل رەتىندە كونستيتۋسيادا بەكىتىلگەنمەن، ءبىراق وسى ۋاقىتقا دەيىن مەملەكەتتىك ءتىل تۋرالى ارنايى زاڭ جوق! ويتكەنى، كونستيتۋسيادا كورسەتىلگەن مەملەكەتتىك ستاتۋستىڭ ومىردە ىسكە اسۋى ءۇشىن ارنايى زاڭ قابىلدانۋى كەرەك ەدى.
سوندىقتان دا مەملەكەتتىك ورگاندارعا قازاق تىلىندە حابارلاسقاندار سول مەملەكەتتىك تىلدە جاۋاپ الا المايتىن جاعداي ءجيى كەزدەسەدى. ويتكەنى، مەملەكەتتىك قىزمەتكەرلەردىڭ كوبىسى قازاق ءتىلدى بىلمەيدى، تەك ورىس تىلىندە سويلەيدى. بۇل جەردە ۇلتى قازاق ازاماتتار تىلدىك ديسكريمانسياعا ۇشىراپ كەلەدى 30 جىلدان بەرى.
سوندىقتان مەن 2012 جىلى «اق جول» پارتياسىنىڭ مەملەكەتتىك ءتىلدىڭ قولدانىلۋىن ارتتىرۋ جونىندە زاڭ جوباسىن جاساعانىن، ونى ۇكىمەت توقتاتىپ تاستاعانىن ەسكە سالدىم.
كەزەكتى رەت مەملەكەتتىك ءتىل تۋرالى زاڭ قابىلداۋدى ۇسىندىم. مەملەكەتتىك ءتىل رەتىندە كونستيتۋسيادا كورسەتىلگەن ستاتۋس سوندا عانا ناقتى ومىردە ىسكە اسادى.
مىنە وسى ۇسىنىستى وزگە ءبىر توپ دەپۋتاتتار دا قولداپ، پاتريوتتىعىن كورسەتتى، ولارعا كوپ راحمەت!
2020 جىلى قازاقستان حالقى اسسامبلەياسىندا بارلىق ەتنوس وكىلدەرى مەملەكەتتىك ءتىلدى مىندەتتەۋ تۋرالى زاڭ قابىلداۋ تۋرالى ۇندەۋ قابىلداعانىن دا اتاپ ايتۋ كەرەك.
ال كونستيتۋسيالىق وزگەرىستەرگە كەلسەك، بۇگىندە باستى ماقسات 30 جىلعى ەسكى سىرەسكەن ساياسي جۇيەنى رەفورمالاپ، جاڭارتىپ جاتقان پرەزيدەنت باستاماسىنا ءبارىمىز قولداۋ ءبىلدىرۋىمىز كەرەك.
بۇل اتازاڭعا ەنەر وزگەرىستەردى حالىق تالقىسىنا سالۋى – جاڭا ءداۋىردى جاريالاعان قازاقستان پرەزيدەنتى قاسىم-جومارت توقايەۆتىڭ تاعى ءبىر جاڭا قادامى.
ەندى ەسكى قازاقستاننىڭ تاپتاۋرىن سۇرلەۋىنەن شارشاعان ەلدى جاڭا قازاقستاننىڭ جاڭا قادامى – حالىقتىڭ ءوز تاعدىرىن ءوزى شەشەتىن رەفەرەندۋمى كۇتىپ تۇر.
جاڭا ءداۋىرىن جاريالاعان قازاق ەلىنىڭ، ەكىنشى رەسپۋبليكانىڭ كونستيتۋسياسى حالىقتىڭ ءوز تاڭداۋىمەن ومىرگە جولداما الماق.
پرەزيدەنت ۇسىنعان مەملەكەتىمىزدى وزگەرتەتىن جالپىحالىقتىق رەفەرەندۋمدا ءبارىمىز ءوز تاڭداۋىمىزدى جاساي بىلەيىك.
قازىبەك يسا، ق ر پارلامەنتى ءماجىلىسى دەپۋتاتى، «اق جول» پارتياسى ءتوراعاسى ورىنباسارى
