قاسيەتتى رامازان ايىنىڭ باستالۋىنا 30 كۇن قالدى. بۇل تۋرالى قازاقستان مۇسىلماندارى ءدىني باسقارماسى مالىمدەدى، دەپ حابارلايدى Dalanews.kz.
2025 جىلعى ءدىني كۇندەر كەستەسىنە سايكەس، بيىل رامازان ايىنىڭ العاشقى كۇنى كوكتەمنىڭ ءبىرىنشى كۇنىنە، ياعني 1 ناۋرىزعا سايكەس كەلەدى. كەستە بويىنشا، بيىل ورازا 29 كۇنگە سوزىلادى. ال ءقادىر ءتۇنى – ناۋرىزدىڭ 26-سىنان 27-سىنە قاراعان ءتۇن.
"دەگەنمەن، جاڭا ايدىڭ كورىنۋىنە بايلانىستى بۇل كۇندەر ءبىر كۇن العا نە ءبىر كۇن كەيىن شەگەرىلۋى مۇمكىن ەكەنىن ۇمىتپاۋ كەرەك"، - دەپ حابارلادى قمدب.
ءدىني باسقارما رامازان ايى باستالماي تۇرىپ، وتكەن جىلداعى قازا بولعان ورازا كۇندەرىن تولىقتىرۋ كەرەگىن ەسكەرتتى.
سونىمەن قاتار استانا قالاسى "دىندەردى زەرتتەۋ ورتالىعىنىڭ" يسلامتانۋشى-لەكتورى ارمان نۇراحمەت ۇلى رامازان ايىنا بايلانىستى ءبىرقاتار كەڭەسىن ۇسىندى.
كىم ورازا ۇستاۋعا مىندەتتى؟
ورازانىڭ مۇسىلماندارعا پارىز بولاتىن شارتتارى:
- باليعات جاسىنا جەتۋ؛
- اقىل ەسى دۇرىس بولۋ؛
- ورازا ۇستاۋشىنىڭ دەنساۋلىعى جارامدى بولۋى؛
رامازان ايىندا كۇندەلىكتى كۇندە ورازانى قالاي ۇستاۋ كەرەك؟
تاڭ اتقاننان (تاڭ نامازىنىڭ باستالۋ ۋاقىتى) كۇن باتقانعا دەيىن (كەشكى اقشام نامازىنىڭ باستالۋىنا دەيىن). وسى ۋاقىت ىشىندە ىشۋگە، تاماق جەۋگە جانە جۇبايىڭىزبەن جىنىستىق قاتىناسقا تۇسۋگە بولمايدى. دەمەك، اقشام نامازى ۋاقىتى كىرگەننەن باستاپ، تاڭ نامازىنا دەيىن (كەشكى جانە تۇنگى ۋاقىت ارالىعىندا)، اتالمىش تىيىمدار رۇقسات ەتىلەدى؛
ورازا ۇستاۋشىنىڭ سارەسى مەن ورازاعا نيەت ەتۋى
ورازا ۇستاۋشىنىڭ سارەسى (سۋحۋر) – رامازان ايىنداعى ورازا كەزىندەگى تاڭ نامازى ۋاقىتى الدىنداعى اۋىز بەكىتۋ (تاماقتى ىشىپ-جەۋ).
نيەت - راببىنىڭ ءامىرىن ورىنداۋ ماقساتىندا، جۇرەكتە ورازا ۇستاۋعا شەشىم قابىلداۋ. نيەتتىڭ ورنى جۇرەك، ءبىراق نيەتتى اۋىزشا ايتۋعا (بىلدىرۋگە) بولادى.
نيەت ايتۋ (ءبىلدىرۋ) نۇسقاسى: «نيەت ەتتىم اللاھ تاعالا ريزالىعى ءۇشىن تاڭنان كەشكە دەيىن رامازان ايىنىڭ ورازاسىن ۇستاۋعا». نەمەسە قمدب – نىڭ رەسمي سايتتارىنىڭ نۇسقالارىن قولدانۋعا بولادى. ءوز ەرىكتەرىمەن ارابشاسىن نەمەس قازاقشاسىن ايتساڭىز بولادى.
اۋىز اشار (يفتار) – رامازان ايىنىڭ ورازا كەزىندەگى كەشكى اسى. اۋىز اشار الدىندا دۇعا جاساۋمەنەن باستاعانى جاقسى.
دۇعا جاساۋ نۇسقاسى: «ءيا اللاھ تاعالا، سەن ءۇشىن ورازا ۇستادىم، ساعان نيەت ەتتىم، ساعان سەندىم. سەنىڭ بەرگەن نەسىبەڭمەن اۋىز اشتىم. ەرتەڭگى كۇننىڭ ورازاسىنا دا نيەت ەتتىم. ءبىزدىڭ وتكەن ءبىلىپ تە، بىلمەي ىستەگەن كۇنالارىمىزدى كەشىرە كور». نەمەسە قمدب – نىڭ رەسمي سايتتارىنىڭ نۇسقالارىن قولدانۋعا بولادى.
تاڭ سارەسىنە ۇيىقتاپ قالسام، سول كۇنگى ورازا ورازا بولىپ سانالا ما؟
تاڭ سارەسىندە اس جەۋ وتە قاجەت. ەگەر ءسىز سارەسىنە ۇيىقتاپ قالساڭىز، ءبىراق ءسىز ۇيىقتار الدىندا كەلەسى كۇنى ورازا ۇستاۋدى جوسپارلاساڭىز (نيەت ەتسەڭىز)، ۇيقىدان تۇرعاننان كەيىن ءسىز ادەتتەگىدەي ورازاڭىزدى جالعاستىراي بەرەسىز. تاڭ سارەسىندە تاماق ىشپەگەنىڭىز ءۇشىن الاڭداماڭىز. ورازاڭىز بۇزىلمايدى.
ورازا كەزىندەگى تىيىمدارى، ونى بۇزاتىن جاعداياتتارى مەن قازالارىنىڭ وتەلىنۋى قمدب-نىڭ رەسمي سايتتارىنان بىلۋىڭىزگە بولادى.
