قازاقستان ۆەلوسيپەد سپورت فەدەراسياسى ماۋسىم قورىتىندىسىن جاساپ، جىلدىڭ باستى جەتىستىكتەرىن، جۇزەگە اسقان جوبالاردى جانە 2026 جىلعا جوسپارلانعان دامۋ باعىتتارىن تانىستىردى. سالتاناتتى ءىس-شارا سپورتشىلاردى، جاتتىقتىرۋشىلاردى، مەملەكەتتىك ورگاندار مەن فەدەراسيا سەرىكتەستەرىن بىرىكتىردى، دەپ حابارلايدى Dalanews.kz.
2025 جىلى فەدەراسيا ايتارلىقتاي اۋقىمدى جۇمىس اتقارىپ، ەل ىشىندە دە، حالىقارالىق ارەنادا دا جوعارى ناتيجەلەر كورسەتتى. قازاقستاندىق ۆەلوسپورتشىلار ءىرى حالىقارالىق جارىستاردا بارلىعى 36 مەدال جەڭىپ الدى: 14 التىن، 12 كۇمىس جانە 10 قولا. مالايزيا مەن تايلاندتا وتكەن ازيا چەمپيوناتتارىندا ترەك، شوسسە جانە پارا-ۆەلوسپورت باعىتىنداعى ۇلتتىق قۇرامالار بىرنەشە مارتە جۇلدەگەرلەر قاتارىنان كورىنىپ، قازاقستاننىڭ ايماقتاعى پوزيسياسىن نىعايتتى.
جارقىن جەتىستىكتەردىڭ ءبىرى – باحرەيندە وتكەن جاسوسپىرىمدەر اراسىنداعى III ازيا ويىندارى. قازاقستاننىڭ جاس سپورتشىلارى بۇل جارىستا 2 التىن جانە 1 كۇمىس مەدال ەنشىلەدى.
قازاقستان ۆەلوسيپەد سپورتى فەدەراسياسىنىڭ پرەزيدەنتى، «اتامەكەن» ق ر ۇكپ ءتورالقا ءتوراعاسى رايىمبەك باتالوۆ 2025 جىلدى سوڭعى ۋاقىتتارداعى ەڭ تابىستى ماۋسىمداردىڭ ءبىرى بولعانىن اتاپ ءوتتى.
«بۇل جەتىستىكتەر قازاقستاندا بولاشاق چەمپيونداردىڭ مىقتى بۋىنى قالىپتاسىپ كەلە جاتقانىن دالەلدەيدى. ماۋنتينبايك، ترەك جانە شوسسە باعىتتارىندا جىل بويى ەلىمىزدىڭ ءار وڭىرىندە 20 ۇلتتىق چەمپيونات پەن كۋبوك جارىستارى ءوتتى. شىمكەنت، قوستاناي، تاراز، سەمەي، استانا جانە قونايەۆ قالالارىندا وتكەن جارىستار ىشكى كۇنتىزبەنىڭ گەوگرافياسىن كەڭەيتىپ، قاتىسۋشىلار سانىن ەداۋىر ارتتىردى. بۇل — قازاقستاندىق ۆەلوسپورت تاريحىنداعى ەڭ قارقىندى جانە مازمۇندى ماۋسىمداردىڭ ءبىرى. سپورتشىلارىمىز حالىقارالىق ارەنادا دا جارقىن ءارى سەنىمدى ناتيجەلەر كورسەتتى»، - دەدى رايىمبەك باتالوۆ.
فەدەراسيا بيىل دا اۋىلدىق جەرلەردەگى سپورت مەكتەپتەرىن قولداۋ باعدارلاماسىن جالعاستىردى. وعان سايكەس ونداعان بالالار مەن جاسوسپىرىمدەر سپورت مەكەمەلەرى جاڭا ۆەلوسيپەد بولشەكتەرىمەن، سپورتتىق فورمامەن جانە وقۋ-جاتتىعۋ پروسەسىنە قاجەتتى تەحنيكالىق جابدىقتارمەن تولىقتى. بۇل باستاما اۋىل بالالارىنا ۆەلوسپورتقا تەڭ قولجەتىمدىلىك بەرىپ، جاڭا تالانتتاردى انىقتاۋعا جانە ەلدىڭ سپورتتىق ينفراقۇرىلىمىن نىعايتۋعا سەرپىن بەردى.
اتقارىلعان جۇمىسقا تۋريزم جانە سپورت ۆيسە-مينيسترى سەرىك جاراسبايەۆ تا جوعارى باعاسىن بەردى.
«قازىرگى تاڭدا قازاقستاندىق ۆەلوسپورت سەرپىندى دامۋدىڭ جاڭا كەزەڭىندە تۇر. پرەزيدەنت ۇكىمەتكە بارلىق جاعداي جاساپ، سالانى قولداۋدى كۇشەيتۋدى تاپسىردى. ونىڭ ناقتى ناتيجەسىن بۇگىندە كورىپ وتىرمىز. الدىمىزدا ۇلكەن مىندەتتەر بار: كەلەسى جىلى ازيا ويىندارى، ودان كەيىن وليمپياداعا دايىندىق. ەگەر كۇش-جىگەرىمىزدى بىرىكتىرىپ، جۇيەلى دايىندىقتى جالعاستىرساق، جوعارى ناتيجەلەرگە قول جەتكىزە الاتىنىمىزعا سەنىمدىمىن. مينيسترلىك تاراپىنان جان-جاقتى قولداۋ كورسەتۋگە دايىنبىز»، - دەدى ول.
سالتاناتتى ءىس-شارانىڭ ماڭىزدى ساتتەرىنىڭ ءبىرى - «التىن دوڭگەلەك» اتتى جىل سايىنعى سيمۆوليكالىق ماراپاتتى «جاسوسپىرىمدەر» ساناتىنداعى جىلدىڭ ۇزدىك سپورتشىسىنا تابىستاۋ بولدى. بيىلعى جۇلدەنىڭ يەگەرى – 2009 جىلى تۋعان، الماتى قالاسىنىڭ وكىلى، قازاقستاننىڭ بىرنەشە دۇركىن چەمپيونى گلەب نوۆيكوۆ.
«مەن ۆەلوسپورتقا كەزدەيسوق كەلدىم. اۋلادا ۆەلوسيپەد تەۋىپ جۇرگەندە، بولاشاق باپكەرىمنىڭ جۇبايى بايقاپ قالىپ، سەكسياعا بارىپ كورۋدى ۇسىندى. سودان بەرى وسى سپورتپەن اينالىسىپ كەلەمىن. ءقازىر مەن — شوسسە جارىسى بويىنشا قازاقستاننىڭ ءۇش دۇركىن چەمپيونىمىن، ماۋنتينبايك بويىنشا ەلدىڭ ەكى دۇركىن چەمپيونىمىن. ۆەلوسپورتسىز ءومىرىمدى ەلەستەتە المايمىن. بولاشاقتا وليمپيادا چەمپيونى بولۋدى ارماندايمىن»، — دەدى گلەب نوۆيكوۆ.
باسقوسۋ بارىسىندا ايەلدەر كومانداسى UAE Team ADQ-مەن ىنتىماقتاستىق تۋرالى كەلىسىمگە قول قويىلۋى ەرەكشە نازارعا يە بولدى. بۇل باستاما قازاقستانداعى ايەلدەر ۆەلوسپورتىنىڭ جاڭا كەزەڭىن اشىپ، سپورتشىلارعا حالىقارالىق دەڭگەيدە دايىندالۋعا، بىرلەسكەن جاتتىعۋ باعدارلامالارىنا قاتىسۋعا جانە الەمنىڭ ۇزدىك ۆەلوشاباندوزدارىمەن تاجىريبە الماسۋعا مۇمكىندىك بەرەدى. سونداي-اق، بۇل سەرىكتەستىك 2026 جىلى جاپونيادا وتەتىن ازيا ويىندارىنا دايىندىقتى كۇشەيتەدى.
«قازاقستاندا ايەلدەر ۆەلوسپورتىنىڭ دامۋىنا ۇلەس قوسۋ – مەن ءۇشىن ۇلكەن قۋانىش. بۇگىن ءبىز بولاشاقتاعى جەڭىستەرگە جول اشىپ جاتىرمىز: بۇل جۇيەلى جۇمىس، جاڭا حالىقارالىق مۇمكىندىكتەر جانە تالانتتى سپورتشىلاردى قولداۋ. الدا جاقسى ناتيجە مەن ۇلكەن جەتىستىكتەر كۇتەدى دەپ سەنەمىن»، — ءباا ADQ UCI WT ايەلدەر ۆەلوكومانداسىنىڭ باس ديرەكتورى يانا زەل.
ءىس-شارانىڭ ەڭ ەرەكشە كەزەڭى — ۆەلوسپورتقا العاش قادام جاساپ جۇرگەن ەڭ كىشكەنتاي سپورتشىلاردى ماراپاتتاۋ ءراسىمى بولدى. بۇل ءداستۇر بالالاردى ەرتە جاستان سپورتقا باۋلۋدىڭ، بەلسەندى ءومىر سالتىنا قىزىعۋشىلىق قالىپتاستىرۋدىڭ ماڭىزىن كورسەتەدى.
سونىمەن قاتار جاسوسپىرىمدەر اراسىنداعى III ازيا ويىندارىنىڭ چەمپيوندارى دا ماراپاتتالىپ، ولاردىڭ جەڭىستەرى ەلىمىزدىڭ دايىندىق جۇيەسىنىڭ تيىمدىلىگىن جانە قازاقستاننىڭ حالىقارالىق سپورتتىق بەدەلىن كۇشەيتە ءتۇستى.
سالتاناتتى كەشتىڭ قورىتىندى بولىمىندە ELITE ساناتىنداعى ۇزدىك سپورتشىلار — شوسسە، ترەك، MTB، BMX جانە پاراۆەلوسپورت باعىتتارى بويىنشا ماراپاتتالدى. ولاردىڭ حالىقارالىق ارەناداعى جەتىستىكتەرى قازاقستاندى قۋاتتى جانە بولاشاعى زور ۆەلوسپورت ەلى رەتىندە تانىتۋعا زور ۇلەس قوستى.
