Qazaqstan velosıped sport federasıasy maýsym qorytyndysyn jasap, jyldyń basty jetistikterin, júzege asqan jobalardy jáne 2026 jylǵa josparlanǵan damý baǵyttaryn tanystyrdy. Saltanatty is-shara sportshylardy, jattyqtyrýshylardy, memlekettik organdar men Federasıa seriktesterin biriktirdi, dep habarlaıdy Dalanews.kz.
2025 jyly Federasıa aıtarlyqtaı aýqymdy jumys atqaryp, el ishinde de, halyqaralyq arenada da joǵary nátıjeler kórsetti. Qazaqstandyq velosportshylar iri halyqaralyq jarystarda barlyǵy 36 medal jeńip aldy: 14 altyn, 12 kúmis jáne 10 qola. Malaızıa men Taılandta ótken Azıa chempıonattarynda trek, shose jáne para-velosport baǵytyndaǵy ulttyq quramalar birneshe márte júldegerler qatarynan kórinip, Qazaqstannyń aımaqtaǵy pozısıasyn nyǵaıtty.
Jarqyn jetistikterdiń biri – Bahreınde ótken jasóspirimder arasyndaǵy III Azıa oıyndary. Qazaqstannyń jas sportshylary bul jarysta 2 altyn jáne 1 kúmis medal enshiledi.
Qazaqstan velosıped sporty federasıasynyń prezıdenti, «Atameken» QR UKP Tóralqa tóraǵasy Raıymbek Batalov 2025 jyldy sońǵy ýaqyttardaǵy eń tabysty maýsymdardyń biri bolǵanyn atap ótti.
«Bul jetistikter Qazaqstanda bolashaq chempıondardyń myqty býyny qalyptasyp kele jatqanyn dáleldeıdi. Maýntınbaık, trek jáne shose baǵyttarynda jyl boıy elimizdiń ár óńirinde 20 ulttyq chempıonat pen kýbok jarystary ótti. Shymkent, Qostanaı, Taraz, Semeı, Astana jáne Qonaev qalalarynda ótken jarystar ishki kúntizbeniń geografıasyn keńeıtip, qatysýshylar sanyn edáýir arttyrdy. Bul — qazaqstandyq velosport tarıhyndaǵy eń qarqyndy jáne mazmundy maýsymdardyń biri. Sportshylarymyz halyqaralyq arenada da jarqyn ári senimdi nátıjeler kórsetti», - dedi Raıymbek Batalov.
Federasıa bıyl da aýyldyq jerlerdegi sport mektepterin qoldaý baǵdarlamasyn jalǵastyrdy. Oǵan sáıkes ondaǵan balalar men jasóspirimder sport mekemeleri jańa velosıped bólshekterimen, sporttyq formamen jáne oqý-jattyǵý prosesine qajetti tehnıkalyq jabdyqtarmen tolyqty. Bul bastama aýyl balalaryna velosportqa teń qoljetimdilik berip, jańa talanttardy anyqtaýǵa jáne eldiń sporttyq ınfraqurylymyn nyǵaıtýǵa serpin berdi.
Atqarylǵan jumysqa Týrızm jáne sport vıse-mınıstri Serik Jarasbaev ta joǵary baǵasyn berdi.
«Qazirgi tańda qazaqstandyq velosport serpindi damýdyń jańa kezeńinde tur. Prezıdent Úkimetke barlyq jaǵdaı jasap, salany qoldaýdy kúsheıtýdi tapsyrdy. Onyń naqty nátıjesin búginde kórip otyrmyz. Aldymyzda úlken mindetter bar: kelesi jyly Azıa oıyndary, odan keıin Olımpıadaǵa daıyndyq. Eger kúsh-jigerimizdi biriktirip, júıeli daıyndyqty jalǵastyrsaq, joǵary nátıjelerge qol jetkize alatynymyzǵa senimdimin. Mınıstrlik tarapynan jan-jaqty qoldaý kórsetýge daıynbyz», - dedi ol.
Saltanatty is-sharanyń mańyzdy sátteriniń biri - «Altyn dóńgelek» atty jyl saıynǵy sımvolıkalyq marapatty «Jasóspirimder» sanatyndaǵy jyldyń úzdik sportshysyna tabystaý boldy. Bıylǵy júldeniń ıegeri – 2009 jyly týǵan, Almaty qalasynyń ókili, Qazaqstannyń birneshe dúrkin chempıony Gleb Novıkov.
«Men velosportqa kezdeısoq keldim. Aýlada velosıped teýip júrgende, bolashaq bapkerimniń jubaıy baıqap qalyp, seksıaǵa baryp kórýdi usyndy. Sodan beri osy sportpen aınalysyp kelemin. Qazir men — shose jarysy boıynsha Qazaqstannyń úsh dúrkin chempıonymyn, maýntınbaık boıynsha eldiń eki dúrkin chempıonymyn. Velosportsyz ómirimdi elestete almaımyn. Bolashaqta Olımpıada chempıony bolýdy armandaımyn», — dedi Gleb Novıkov.
Basqosý barysynda áıelder komandasy UAE Team ADQ-men yntymaqtastyq týraly kelisimge qol qoıylýy erekshe nazarǵa ıe boldy. Bul bastama Qazaqstandaǵy áıelder velosportynyń jańa kezeńin ashyp, sportshylarǵa halyqaralyq deńgeıde daıyndalýǵa, birlesken jattyǵý baǵdarlamalaryna qatysýǵa jáne álemniń úzdik veloshabandozdarymen tájirıbe almasýǵa múmkindik beredi. Sondaı-aq, bul seriktestik 2026 jyly Japonıada ótetin Azıa oıyndaryna daıyndyqty kúsheıtedi.
«Qazaqstanda áıelder velosportynyń damýyna úles qosý – men úshin úlken qýanysh. Búgin biz bolashaqtaǵy jeńisterge jol ashyp jatyrmyz: bul júıeli jumys, jańa halyqaralyq múmkindikter jáne talantty sportshylardy qoldaý. Alda jaqsy nátıje men úlken jetistikter kútedi dep senemin», — BAÁ ADQ UCI WT Áıelder velokomandasynyń bas dırektory Iana Zel.
İs-sharanyń eń erekshe kezeńi — velosportqa alǵash qadam jasap júrgen eń kishkentaı sportshylardy marapattaý rásimi boldy. Bul dástúr balalardy erte jastan sportqa baýlýdyń, belsendi ómir saltyna qyzyǵýshylyq qalyptastyrýdyń mańyzyn kórsetedi.
Sonymen qatar jasóspirimder arasyndaǵy III Azıa oıyndarynyń chempıondary da marapattalyp, olardyń jeńisteri elimizdiń daıyndyq júıesiniń tıimdiligin jáne Qazaqstannyń halyqaralyq sporttyq bedelin kúsheıte tústi.
Saltanatty keshtiń qorytyndy bóliminde ELITE sanatyndaǵy úzdik sportshylar — shose, trek, MTB, BMX jáne paravelosport baǵyttary boıynsha marapattaldy. Olardyń halyqaralyq arenadaǵy jetistikteri Qazaqstandy qýatty jáne bolashaǵy zor velosport eli retinde tanytýǵa zor úles qosty.
