2024 جىلدىڭ قورىتىندىسى بويىنشا شامامەن 1،4 ملن قازاقستاندىق جالپى سوماسى 958،3 ملرد تەڭگەگە بەس الەۋمەتتىك تاۋەكەل بويىنشا مەملەكەتتىك الەۋمەتتىك ساقتاندىرۋ قورىنان (ءماسق) الەۋمەتتىك تولەمدەر الدى، دەپ جازادى Dalanews.kz.
بۇل تۋرالى بۇگىن، 3 اقپاندا ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
ەڭبەككە قابىلەتتىلىگىنەن ايىرىلۋ جاعدايى بويىنشا الەۋمەتتىك تولەم مىندەتتى الەۋمەتتىك ساقتاندىرۋ جۇيەسىنە (بۇدان ءارى – جۇيە) قاتىسۋشىلارعا مۇگەدەكتىگى بويىنشا مەملەكەتتىك الەۋمەتتىك جاردەماقىعا قوسىمشا تاعايىندالادى، ول بيۋدجەت قاراجاتى ەسەبىنەن تولەنەدى. ءماسق-دان تولەم مەديسينالىق-الەۋمەتتىك ساراپتامادا بەلگىلەنگەن دارەجەسى 30% - دان 100% - عا دەيىنگى جالپى ەڭبەككە قابىلەتتىلىگىن جوعالتۋ كەزەڭىندە جۇزەگە اسىرىلادى جانە ول ەڭبەك قىزمەتىن جالعاستىرۋعا بايلانىستى ەمەس.
2024 جىلى ەڭبەك ەتۋ قابىلەتىنەن ايىرىلۋ جاعدايى بويىنشا تولەمدى 102 مىڭنان استام ادام 46،6 ملرد تەڭگە سوماسىنا الدى، بۇل 2023 جىلمەن سالىستىرعاندا 20%-عا ارتىق. بەلگىلەنگەن تولەمنىڭ اي سايىنعى ورتاشا مولشەرى 60 407 تەڭگەنى قۇرادى.
اسىراۋشىسىنان ايىرىلۋ جاعدايى بويىنشا الەۋمەتتىك تولەم بيۋدجەت قاراجاتى ەسەبىنەن اسىراۋشىسىنان ايىرىلۋ بويىنشا مەملەكەتتىك الەۋمەتتىك جاردەماقىعا قوسىمشا جۇيەگە قاتىسۋشىنىڭ اسىراۋىندا بولعان ادامدارعا تاعايىندالادى. ءماسق-دان تولەم اسىراۋىنداعى ادامدار 18 جاسقا تولعانعا دەيىن، ال كۇندىزگى وقۋ نىسانىندا وقىعان جاعدايىندا –23 جاسقا دەيىن جۇزەگە اسىرىلادى.
ەسەپتى كەزەڭدە كورسەتىلگەن تولەمدى اسىراۋشىسىنان ايىرىلعان 67،9 مىڭ وتباسى 33،8 ملرد تەڭگە سوماسىنا الدى، بۇل 2023 جىلمەن سالىستىرعاندا 26%-عا ارتىق. بەلگىلەنگەن تولەمنىڭ اي سايىنعى ورتاشا مولشەرى 64 772 تەڭگەنى قۇرادى.
ءماسق-دان جۇمىسىنان ايىرىلۋ جاعدايى بويىنشا الەۋمەتتىك تولەم جۇيەنىڭ قاتىسۋشىسىنا ونىڭ جۇمىستان شىعارىلۋ سەبەبىنە قاراماستان تاعايىندالادى. تاعايىنداۋدىڭ باستى شارتى – جۇمىسسىز رەتىندە تىركەلۋ. جۇيەگە قاتىسۋ وتىلىنە بايلانىستى تولەم 1 ايدان 6 ايعا دەيىن جۇزەگە اسىرىلادى. ونىڭ مولشەرى جۇمىسسىز رەتىندە تىركەلگەنگە دەيىنگى سوڭعى 2 جىلداعى ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىسقا جانە جۇيەگە قاتىسۋ وتىلىنە بايلانىستى.
وتكەن جىلى اتالعان تولەم 88،2 ملرد تەڭگە سوماسىنا جۇزەگە اسىرىلدى، ونى 293،6 مىڭ ادام الدى، بۇل 2023 جىلعى الۋشىلار سانىنان 31%-عا ارتىق. بەلگىلەنگەن تولەمنىڭ اي سايىنعى ورتاشا مولشەرى 81 500 تەڭگەنى قۇرادى.
جۇكتىلىككە جانە بوسانۋعا، جاڭا تۋعان بالانى (بالالاردى) اسىراپ الۋعا بايلانىستى تابىسىنان ايىرىلۋ جاعدايى بويىنشا الەۋمەتتىك تولەم جۇكتىلىك جانە بوسانۋ بويىنشا دەمالىستىڭ بارلىق كۇندەرىنە تاعايىندالادى. تولەم مولشەرى جۇكتىلىككە جانە بوسانۋعا بايلانىستى دەمالىس كۇنىنە دەيىنگى سوڭعى 12 ايدا ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىسقا جانە ەڭبەككە جارامسىزدىق كۇندەرىنىڭ سانىنا بايلانىستى.
2024 جىلى اتالعان ءبىرجولعى تولەمدى 245،7 مىڭ بولاشاق انا جالپى سوماسى 385،6 ملرد تەڭگەگە الدى، بۇل 2023 جىلى تولەنگەن سومادان 11%-عا ارتىق. تاعايىندالعان تولەمنىڭ ورتاشا مولشەرى 1 621 299 تەڭگەنى قۇرادى.
ءبىر جارىم جاسقا دەيىنگى بالا كۇتىمىنە بايلانىستى تابىسىنان ايىرىلۋ جاعدايى بويىنشا اي سايىنعى الەۋمەتتىك تولەم جۇيەگە قاتىسۋشىعا بالا تۋعان كۇننەن باستاپ تاعايىندالادى. تولەم مولشەرى سوڭعى 2 جىلدا ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40%-ىن قۇرايدى. ەكى جانە ودان دا كوپ بالا تۋعان كەزدە تولەم ءاربىر بالاعا جەكە تاعايىندالادى.
"2024 جىلى بۇل تولەم 276،8 مىڭ ادامعا تاعايىندالدى جانە اي سايىنعى ورتاشا تولەم مولشەرى 86 758 تەڭگەنى قۇرادى. 2024 جىلى بارلىق تولەم الۋشىلاردىڭ سانى 672،6 مىڭ ادام بولدى، ال تولەمدەر 404،1 ملرد تەڭگەگە جاسالدى، بۇنىڭ ءوزى 2023 جىلعى سومادان 1،4 ەسە كوپ. وسىلايشا، جۇمىس ىستەمەيتىن ادامدارعا قاراعاندا، جۇمىس ىستەيتىن ازاماتتاردى مىندەتتى الەۋمەتتىك ساقتاندىرۋ جۇيەسىنە قاتىسۋ ارقىلى الەۋمەتتىك قورعاۋ الدەقايدا جوعارى"، دەلىنگەن حابارلامادا.
بۇعان دەيىن ءبىز 2025 جىلدان باستاپ ەلىمىزدە كەدەيشىلىك شەگى جاڭا تاسىلمەن ەسەپتەلەتىنىن جازعان بولاتىنبىز. وعان سايكەس، تابىسى 100 مىڭ تەڭگەدەن تومەن ادامدار كەدەي سانالاتىن بولادى.
