قازاقستاننان 2024 جىلى اي سايىن 50 مىڭ تونناعا دەيىن جانار-جاعارماي ماتەريالدارى (ججم) “قاپتاما تاۋار” رەتىندە ەكسپورتتالعان. بۇل تۋرالى ءماجىلىس دەپۋتاتتارىنىڭ ساۋالىنا جاۋاپ بەرگەن ءبىرىنشى ۆيسە-پرەمەر رومان سكليار مالىمدەدى، دەپ حابارلايدى Dalanews.kz.
ونىڭ ايتۋىنشا، نافتا، كەمە جانە پەش وتىنىنا قاتىستى ەكسپورتتىق شەكتەۋلەردى الىپ تاستاۋ ۇسىنىسىنا بايلانىستى بىلاي دەدى:
"قازاقستان مەن كورشىلەس ەلدەر اراسىنداعى ججم باعاسىنىڭ ايتارلىقتاي ايىرماشىلىعى 2024 جىلى جانار-جاعارمايدى جاپپاي سىرتقا شىعارۋعا جانە ىشكى قوردىڭ كۇرت ازايۋىنا الىپ كەلدى. جالپى العاندا، ججم قورى 430 مىڭ تونناعا كەمىدى. قۇقىق قورعاۋ ورگاندارىنىڭ مالىمەتىنشە، اي سايىن 50 مىڭ تونناعا دەيىن جانار-جاعارماي “قاپتاما تاۋار” رەتىندە شەكارا اسقان. بۇل رەتتە مۇناي ونىمدەرىنىڭ ەداۋىر بولىگى شاعىن مۇناي وڭدەۋ زاۋىتتارىنان (ءميني-موز) شىعارىلعان"، – دەدى رومان سكليار.
ول سونداي-اق 2025 جىلدىڭ اقپانىندا قارجى مونيتورينگى اگەنتتىگى (قما) قىرعىزستانعا زاڭسىز جولمەن 8 ۆاگون-سيستەرنا (480 توننا) اي-92 ماركالى بەنزيندى «قاپتاما تاۋار» رەتىندە الىپ وتپەك بولعان ارەكەتتى توقتاتقانىن ەسكە سالدى.
"2023-2024 جىلدارى ميني-موز-دەردەن شامامەن 117 مىڭ توننا ججم سىرتقا شىعارىلعان"، – دەپ تولىقتىردى ءبىرىنشى ۆيسە-پرەمەر.
ايتا كەتەيىك، بۇعان دەيىن پارلامەنت دەپۋتاتتارى ەلدە مۇناي ەكسپورتتاۋشى ءىرى مەملەكەتتەردىڭ ءبىرى بولا تۇرا، جانارماي تاپشىلىعى جۇيەلى ماسەلەگە اينالعانىن كوتەرگەن ەدى. دەپۋتاتتاردىڭ پىكىرىنشە، تاپشىلىقتىڭ باستى سەبەپتەرى – ءۇش ءىرى مۇناي وڭدەۋ زاۋىتىنىڭ قۋاتىنىڭ جەتكىلىكسىزدىگى، شىلدە-قىركۇيەك ارالىعىنداعى جوندەۋ جۇمىستارى جانە مۇناي ونىمدەرىنىڭ يمپورتقا تاۋەلدىلىگى. بۇل جاعداي ەلدىڭ ەنەرگەتيكالىق قاۋىپسىزدىگىنە قاتەر توندىرەدى.
التەرناتيۆ رەتىندە "اق جول" فراكسياسى 30-دان استام شاعىن مۇناي وڭدەۋ زاۋىتتارىنىڭ الەۋەتىن ءتيىمدى پايدالانۋ قاجەت ەكەنىن اتاپ ءوتتى. بۇل زاۋىتتار شيكىزاتقا قول جەتكىزۋدە قيىندىقتارعا تاپ بولىپ وتىر جانە وڭدەلگەن ءونىمدى ەكسپورتتاۋعا تىيىم سالىنعان.
دەپۋتاتتار:
• ەكسپورتتىق شەكتەۋلەردى الىپ تاستاپ، قاتاڭ باقىلاۋ ورناتۋ؛
• قۇرال-جابدىقتاردى جاڭعىرتۋ ءۇشىن مەملەكەتتىك قولداۋ كورسەتۋ؛
• مۇنايدى بولۋدەگى اشىقتىقتى قامتاماسىز ەتۋ؛
• شاعىن زاۋىتتاردى 2050 جىلعا دەيىنگى مۇناي وڭدەۋ ستراتەگياسىنا ەنگىزۋ
سياقتى ۇسىنىستاردى العا تارتتى.
