استانانىڭ كامەلەتكە تولماعان تۇرعىنى زاڭسىز ينتەرنەت-سحەماعا قاتىسقان. ول sim-كارتالاردى ساتىپ الىپ، ولاردى ءۇشىنشى تۇلعالارعا زاڭسىز ماقساتتا پايدالانۋ ءۇشىن بەرگەن، دەپ حابارلايدى Dalanews.kz.
پوليسيا دەپارتامەنتىنىڭ دەرەگىنشە، قىلمىستىق سحەمانى ۇيىمداستىرۋشىلار مەسسەندجەرلەر مەن ءموبيلدى قوسىمشالاردا “وڭاي تابىس” ۋادە ەتىپ، حابارلاندىرۋلار جاريالايدى. ول ءۇشىن قاتىسۋشىلاردان بايلانىس وپەراتورلارىنىڭ sim-كارتالارىن ساتىپ الىپ، ولاردى “بايلانىستى قۇرىلعىلار” فۋنكسياسى ارقىلى قولجەتىمدى ەتۋىن تالاپ ەتەدى. مۇنداي شارتتاردى ورىنداعاندارعا كۇن سايىن سىياقى بەرەتىنىن ايتادى.
ءجاسوسپىرىم وسى ۇسىنىسقا سەنىپ، كوپ مولشەردە sim-كارتا ساتىپ الىپ، ولاردى بەلگىسىز تۇلعالارعا قاشىقتان قولجەتىمدى ەتكەن. ناتيجەسىندە پوليسيا قىزمەتكەرلەرى ونىڭ قولىنان شامامەن 20 sim-كارتانى تاركىلەدى. ولار الاياقتىق ارەكەتتەرگە پايدالانىلۋى مۇمكىن ەدى.
قۇقىق قورعاۋ ورگاندارى كامەلەتكە تولماعان بالانىڭ اتا-اناسىن بالا تاربيەسىندەگى مىندەتىن دۇرىس ورىنداماعانى ءۇشىن اكىمشىلىك جاۋاپكەرشىلىككە تارتتى.
“Sim-كارتالار مەن جەكە دەرەكتەردى ءۇشىنشى تۇلعالارعا بەرۋ قىلمىستىق سحەمالاردىڭ ءبىر بولىگىنە اينالۋى مۇمكىن. زاڭناما مۇنداي ارەكەتتەر ءۇشىن جاۋاپكەرشىلىك قاراستىرادى. ازاماتتاردى ساق بولۋعا، جەڭىل تابىس تۋرالى كۇماندى ۇسىنىستارعا الدانباۋعا جانە مۇنداي جاعدايلار بايقالعاندا پوليسياعا حابارلاۋعا شاقىرامىز”، – دەلىنگەن حابارلامادا.
