شىمكەنتتە بىرنەشە جىل قىزمەت ەتكەن اتىشۋلى “ارمان” مونشاسى جابىلدى، دەپ حابارلايدى Dalanews.kz.
Halyqstan تەلەگرام ارناسىنىڭ مالىمەتىنشە، بۇل ورىن كوپشىلىككە بەلگىلى بولسا دا، بيلىك ونى ۇزاق ۋاقىت بويى “بايقاماعان”.
“ەڭ تاڭعالارلىعى، جەزوكشەلىكپەن بايلانىستى بۇل نىسان قالاداعى №8 گيمنازيانىڭ ءدال جانىندا ورنالاسقان. مەكتەپتىڭ تەرەزەسىنەن كليەنتتەر دەمالاتىن بولمەلەر انىق كورىنەتىن”، — دەيدى دەرەككوز.
قالا بيلىگى بۇل ماسقارا مۇرادان ارىلۋدى ءجون كوردى
شىمكەنت قالاسىنىڭ پوليسيا دەپارتامەنتى تەرگەۋ امالدارىنىڭ اياقتالعانىن حابارلاعان. قۇقىق قورعاۋ ورگاندارىنىڭ مالىمەتىنشە، ءىس ءقازىر اۋدانارالىق سوتقا جولدانعان. قالالىق پروكۋراتۋرا دا بۇل اقپاراتتى راستادى.
“پوليسەيلەر قالاداعى ەكى بىردەي نىساندى تەكسەردى: ءبىرى – ورتالىقتاعى تاۋكە حان داڭعىلىندا، ەكىنشىسى – سايرام كوشەسىندە ورنالاسقان. وپەراتيۆتىك شارالار بارىسىندا 20 شاقتى قىز ۇستالدى. ولار شاقىرتۋ بويىنشا قىزمەت كورسەتكەن. ال ءۇش اكىمشىگە جەڭگەتايلىق جاساعانى ءۇشىن ايىپ تاعىلىپ، ولار 7 جىلعا دەيىن باس بوستاندىعىنان ايىرىلۋى مۇمكىن ”، — دەيدى دەرەككوز.
ءبىراق بۇل ءىستىڭ باستى تۇلعاسى سانالاتىن مونشا يەسى تەرگەۋگە ىلىكپەگەن.
بۇكىل قالا بىلەتىن نارسەنى كاسىپكەردىڭ ءوزى بىلمەدى دەگەنگە كىم سەنەدى؟
قالالىق پروكۋراتۋرا بۇل جاعدايعا قاتىستى تۇسىنىكتەمە بەرىپ، ايىپتالعانداردىڭ كىنانى تولىق ءوز مويىندارىنا العانىن مالىمدەدى.
“ولار عيماراتتاردى جالعا العاندارىن، ال مەنشىك يەسىنىڭ بۇل ورىنداردىڭ قانداي ماقساتتا پايدالانىلعانىنان حابارسىز ەكەنىن ايتتى”، – دەپ مالىمدەدى پروكۋراتۋرا وكىلدەرى.
الايدا بۇل ۋاجگە كوپشىلىك كۇمانمەن قارايدى. ءتىپتى، 2GIS قوسىمشاسىنداعى پىكىرلەردە مونشا كليەنتتەرى "ارمان" بەلگىلى ءبىر "دياديا ميشاعا" تيەسىلى ەكەنىن اشىق جازعان.
مونشا يەسى بۇرىن دا قىلمىستىق ىستەرگە ىلىككەن
"بەلگىلى بولعانداي، بۇل – 58 جاستاعى مىقتىبەك بەكەيەۆ، "ارمان" كورپوراسياسىنىڭ تۇراقتى باسشىسى. ول بۇعان دەيىن دە قىلمىستىق جاڭالىقتارعا ىلىككەن ادام”، — دەيدى دەرەككوز.
مالىمەتتەرىنشە، 2009 جىلى ەكى پوليسەي "ارمان" مونشاسىنداعى توبەلەسكە بايلانىستى وقيعا ورنىنا كەلىپ، وزدەرى سوققىعا جىعىلعان. سول كەزدەگى باسشىلىق بۇل ىسكە كوز جۇما قاراپ، تەرگەۋ امالدارى جۇرگىزىلمەگەن. تەك 9 جىلدان كەيىن جابىرلەنۋشى پوليسەيلەر سوتقا شاعىم ءتۇسىرىپ، شابۋىل جاساعان نەگىزگى ادام رەتىندە بەكەيەۆتىڭ ەسىمىن اتاعان.
بۇل – ونىڭ جالعىز بيزنەسى ەمەس
"ارمان" – "دياديا ميشانىڭ" مەنشىگىندەگى جالعىز ورىن ەمەس، ءبىراق ەڭ ايگىلىسى ەكەنى انىق. ونىڭ بۇل كاسىپكە كەلۋى قايتا قۇرۋ جىلدارى باستالعان. ول كەزدە كوممۋنيستىك داڭعىلدىڭ بويىندا ەليتالىق جەزوكشەلەر مەن ۆاليۋتا ايىرباستاۋشىلار جينالاتىن. قازاقستان تاۋەلسىزدىگىن العاننان كەيىن تاۋكە حان داڭعىلىنىڭ بويىندا ايىرباستاۋ بەكەتتەرى كوبەيگەن. ال "دياديا ميشا" وسى ماڭداعى قىزداردى ءوز كاسىبىنە تارتقان.
“كەيىن ول ءۇش قاباتتى ءۇيدىڭ بارلىق پاتەرىن ساتىپ الىپ، اۋلاسىندا ءتورت قاباتتى ەليتالىق مونشا تۇرعىزدى. ال جوعارى لاۋازىمدى كليەنتتەردىڭ ارقاسىندا بۇل بيزنەس 30 جىل بويى زاڭسىزدىقتارعا قاراماستان ءومىر ءسۇردى. ءتىپتى، شىمكەنتتىڭ ەڭ كونە مەكتەپتەرىنىڭ ءبىرى – №8 گيمنازياعا جاڭا عيمارات سالۋ قاجەتتىلىگى تۋىنداعاندا دا، مونشا ەشكىمنىڭ نازارىن اۋدارماعان”، — دەپ قوستى دەرەككوز.
"جىلدار بويى زاڭسىز جۇمىس ىستەگەن مونشانىڭ جابىلۋى – كەش بولسا دا ادىلەتتىڭ سالتانات قۇرۋى"، – دەيدى قالا تۇرعىندارى.
