2025 جىلى 20 قازاننان باستاپ ەۋرازيالىق ەكونوميكالىق كوميسسيانىڭ (ەەك) جاڭا ەرەجەسى كۇشىنە ەنەدى. ەندى قازاقستانعا جەكە تۇلعالاردىڭ ءىرى كولىك قۇرالدارىن اكەلۋ مۇمكىندىگى شەكتەلەدى. اتالعان شەشىم جۇك كولىكتەرىنە، اۆتوبۋستارعا جانە تاعى دا كەيبىر كولىك تۇرلەرىنە قاتىستى، دەپ حابارلايدى Dalanews.kz.
جەكە تۇلعالار ءۇشىن قانداي وزگەرىس بولادى؟
قازاقستان رەسپۋبليكاسى يندۋستريا جانە اۋىل شارۋاشىلىعى مينيسترلىگىنىڭ ونەركاسىپ ساياساتى دەپارتامەنتىنىڭ ديرەكتورى ادىلبەك بەكتىباۆتىڭ ايتۋىنشا، اتالعان كۇننەن باستاپ جەكە تۇلعالار تەك تومەندەگى كولىك تۇرلەرىن جەكە پايدالانۋ ءۇشىن اكەلە الادى:
- جەڭىل اۆتوموبيلدەر (مەديسينالىق ماقساتقا ارنالعاندارىنا رۇقسات بەرىلمەيدى)؛
- جولسىز جەرگە ارنالعان كولىكتەر: كۆادروسيكلدەر، قاردا جۇرەتىن كولىكتەر، باتپاقتا جۇرەتىن كولىكتەر، موتوباگگي، ءبىراق جارىسقا ارنالعان كولىكتەر كىرمەيدى؛
- موتوسيكلدەر، موپەدتەر جانە موتوروللەرلەر؛
- جەڭىل جۇك كولىكتەرى مەن شاعىن اۆتوبۋستار: جۇرگىزۋشىنى قوسا العاندا 12 ادامعا دەيىن تاسىمالداۋعا ارنالعان اۆتوكولىكتەر جانە تولىق ماسساسى 5 تونناعا دەيىنگى جۇك كولىكتەرى. بۇعان جوعارى رادياسيالىق ماتەريالداردى تاسىمالداۋعا ارنالعان ارنايى كولىكتەر كىرمەيدى.
راسىمدەۋ مەن تىركەۋگە ارنالعان شەكتەۋلەر
جاڭا تىزىمگە كىرمەيتىن كولىك تۇرلەرىن اكەلگەن جەكە تۇلعالار:
-
سبكتس (دوڭگەلەكتى كولىك قۇرالىنىڭ قاۋىپسىزدىگى تۋرالى كۋالىك) الا المايدى؛
-
كەدەندىك راسىمدەۋدەن وتكىزە المايدى؛
-
ەپتس (كولىك قۇرالىنىڭ ەلەكتروندى پاسپورتى) الا المايدى؛
-
ۋتيليزاسيالىق الىمدى تولەي المايدى؛
-
كولىكتى مەملەكەتتىك تىركەۋگە قويا المايدى.
ياعني، ەندى اۆتوبۋستار مەن جۇك كولىكتەرىن جەكە تۇلعالار ەمەس، تەك كومپانيالار يمپورتتاي الادى.
نەلىكتەن شەكتەۋ ەنگىزىلدى؟
بيىل جازدا ەەك "جەكە تۇلعالاردىڭ ءوز قاجەتتىلىگى ءۇشىن اكەلەتىن ءبىرلى-جارىم كولىك قۇرالدارى" ۇعىمىنا ناقتىلاۋ ەنگىزدى. شەشىم بويىنشا، جەكە قاجەتتىلىكتەرگە كاسىپكەرلىك قىزمەت كىرمەيدى. بۇل تۇزەتۋلەر كەدەن وداعىنىڭ "دوڭگەلەكتى كولىك قۇرالدارىنىڭ قاۋىپسىزدىگى تۋرالى" تەحنيكالىق رەگلامەنتىنە ەنگىزىلگەن.
