شارا اكىمدىكتىڭ باستاماسىمەن قالالىق قوعامدىق دەنساۋلىق ساقتاۋ باسقارماسىنىڭ ۇيىمداستىرعانىن ايتا كەتۋىمىز كەرەك. اكسيا مۇشەلەرى قالاداعى حالىق كوپ جينالاتىن ورىنداردى ارالاپ، تەكسەرۋ جۇمىستارىن جۇرگىزگەن. بۇدان باسقا شارانى ۇيىمداستىرۋشىلار قالاداعى ساۋدا ورتالىقتارى، بازارلار جانە تۇرعىن ءۇي الاپتارىن دا ارالاعان. نەگىزىنەن باسىمدىق قالا شەتىندەگى ەلدى مەكەندەرگە بەرىلگەن بولاتىن.
– بىزدەر وسى اكسيا بارىسىندا قالاداعى ەمحانالاردا اشىق ەسىك كۇنىن ۇيىمداستىرىپ، تۇرعىندار اراسىندا ءتۇسىندىرۋ جۇمىستارى جۇرگىزدىك. ودان بولەك، جوو دا قامتىلدى، ياعني 4 استانالىق وقۋ ورنىندا فليۋوروگرافيالىق تەكسەرۋ جۇمىسى ۇيىمداستىرىلدى، – دەدى نۇر-سۇلتان قالاسى قوعامدىق دەنساۋلىق ساقتاۋ باسقارما باسشىسىنىڭ ورىنباسارى ءاليا رۇستەموۆا اكىمدىكتە وتكەن باسپا ءسوز ءماسليحاتىندا.
ونىڭ ايتۋىنشا، تۋبەركۋلەز اۋرۋىنا قارسى ۇيىمداستىرىلعان اكسيا 14 مىڭ ادامدى قامتىعان.
– اكسيا ناتيجەسىندە 75 ادامنان تۋبەركۋلەز اۋرۋىنىڭ وڭ بەلگىسى بار بولىپ تابىلدى. ارنايى تەكسەرۋلەردەن كەيىن 9 ادامنان تۋبەركۋلەز اۋرۋىنىڭ العاشقى بەلگىسى انىقتالدى. بۇل باعىتتاعى جۇمىستار الداعى ۋاقىتتا دا جالعاسىن تابادى. جۇمىس كۇندەرى تەكسەرىلە المايتىن ازاماتتار ءۇشىن دەمالىس كۇندەرى تەكسەرۋ جانە انىقتاۋ شارالارى ۇيىمداستىرۋدامىز، – دەدى ول. قالالىق فتيزيوپۋلمونولوگيالىق ورتالىعىنىڭ مالىمەتىنە سۇيەنسەك، ەلوردادا سوڭعى 5 جىلدا اتالعان اۋرۋعا ۇشىراعاندار سانى 1،5 ەسەگە قىسقارعان.
