الەۋمەتتىك جەلى مەن باق-تا 14 جاستاعى قىزعا ءتيىستى دەگەن كۇدىكپەن دومبىرا ۇيىرمەسىنىڭ ءمۇعالىمى قامالدى دەگەن اقپارات تارادى، دەپ حابارلايدى Dalanews.kz.
"ينفورمبيۋرو 31" مالىمەتىنشە، الماتى وبلىسىندا 14 جاستاعى قىزبەن جىنىستىق قاتىناسقا ءتۇستى دەگەن كۇدىكپەن دومبىرا ۇيىرمەسىنىڭ ۇستازى قامالعان.
"ەكەۋى قوناقۇيگە بارىپ، بولمەگە بىرگە كىرگەنى باستان-اياق باقىلاۋ كامەراسىنا جازىلعان. سول ساتتە پوليسەيلەر كەلىپ، 33 جاستاعى ەر ادامنىڭ قولىنا كىسەن سالادى. ال ءقوناقۇيدىڭ قوجايىنى بۇل وقيعانىڭ قاساقانا ۇيىمداستىرىلعانىن ايتادى. سەبەبى كامەلەتكە تولماعان قىز بۇعان دەيىن دە ءدال وسىلاي وزگە ازاماتقا قاستاندىق جاساعان دەپ وتىر"، - دەپ جازىلعان مالىمەتتە.
وقيعانىڭ ءبارى وتەگەن باتىر اۋىلىنداعى قوناقۇيدە بولعان.
الماتى وبلىسى پوليسيا دەپارتامەنتى بۇل ءىس بويىنشا تەرگەۋ جۇرگىزىلىپ جاتقانىن حابارلادى.
"پوليسيا قىزمەتكەرلەرى كۇدىكتىنى انىقتاپ، ۇستاپ اۋداندىق بولىمشەگە جەتكىزدى. ءقازىر بولعان وقيعانىڭ بارلىق ءمان-جايىن جان-جاقتى، تولىق ءارى وبەكتيۆتى انىقتاۋعا باعىتتالعان تەرگەۋ امالدارى جۇرگىزىلىپ جاتىر"، - دەپ جازىلعان حابارلامادا.
الماتى وبلىسى اكىمدىگى جاعدايعا پىكىر ءبىلدىردى.
"ىلە اۋدانى وتەگەن باتىر كەنتىندەگى "ۋ روزى" قوناقۇيىندە بولعان جاعداي بويىنشا وقيعاعا قاتىسقان 14 جاستاعى وقۋشى دا، ءمۇعالىم دە الماتى وبلىسىنىڭ تۇرعىندارى ەمەس"، - دەپ جازىلعان حابارلامادا.
